لاہور( این این آئی) ترجمان پنجاب حکومت مسرت جمشید چیمہ نے کہا ہے کہ بلاول زرداری کے شہباز شریف اور حمزہ شہباز سے رابطوں کے اعلان کے بعد مریم صفدر کو مسلم لیگ (ن) میں اپنی سیاسی حیثیت کا اندازہ ہو گیا ہو گا،مسلم لیگ (ن) میں بھی اکثریتی رائے یہ ہے کہ مریم صفدر کو پارٹی معاملات اور خصوصاً فیصلہ سازی سے

دور رکھا جائے ، وزیر اعظم عمران خان نے ثابت کیا ہے کہ وہ حقیقی معنوں میں قومی لیڈر ہیںاور عوام ان پر اعتماد کا اظہار کرتے ہیں ۔ اپنے ایک بیان میں مسرت جمشید چیمہ نے کہا کہ پیپلز پارٹی نے مریم صفدرکی سیاسی اننگز شروع ہونے سے پہلے ہی ختم کر دی ہے اور اب وہ منہ چھپاتی پھر رہی ہیں ، بلاول زرداری نے مریم صفدر کو صاف کہہ دیا ہے کہ پہلے پارلیمان میں پہنچو پھر سیاست کرنا لیکن مریم صفدر کے انتخاب جیت کر پارلیمان میں پہنچنے کے دور دور تک کوئی امکان نہیں ۔ انہوں نے کہا کہ پیپلز پارٹی نے سنٹرل ایگزیکٹو کونسل کا اجلاس غیر معینہ مدت تک طلب نہ کرنے کا اعلان کر کے پی ڈی ایم کو سرخ جھنڈی دکھا دی ہے ،پی ڈی ایم کی سیاسی موت واقع ہو چکی ہے اور رہنمائوں میں بیمار رہنے کا مقابلہ شروع ہے ۔ انہو ںنے کہا کہ ہماری ہرگز یہ خواہش نہیں کہ اپوزیشن سیاسی طو رپر بند گلی میں داخل ہو اگر یہ اپنی اصلاح کریں تو حکومت اپوزیشن کو فیس سیونگ دینے کے لئے تیار ہے ۔ انہوں نے کہا کہ وزیراعظم عمران خان نے عوام سے براہ راست رابطہ کر کے اور ان کے سوالات کے جوابات دے کر واضح کر دیا ہے کہ ہم انہیں جوابدہ ہیں ، وزیر اعظم عمران خان ماضی کے حکمرانوں کی طرح عوام کی آنکھوں میں دھول جھونکنے کی بجائے انہیں حقیقت سے آگاہ کر رہے ہیں اور پوری قوم وزیر اعظم عمران خان پر اعتماد کا اظہار کرتی ہے ۔

موضوعات:مریم صفدر