اسلام آباد (مانیٹرنگ ڈیسک، آن لائن) وزیراعظم عمران خان نے سینٹ انتخابات کے بعد پیدا ہونیوالی صورتحال اور آئندہ کے سیاسی لائحہ عمل کے بارے میں مشاورت کیلئے گورنر پنجاب اور وزیراعلیٰ پنجاب کو اسلام آباد طلب کر لیا ۔تفصیلات کے مطابق وزیراعظم عمران خان نے چوہدری سرور اور عثمان بزدار کو فوری اسلام آباد پہنچنے کی ہدایت کر دی ہے ۔دوسری جانب وزیراعظم عمران خان نے اعتماد کا ووٹ لینے کیمعاملہ پر حکومتی اور اتحادی جماعتوں کی پارلیمانی پارٹی کا اجلاس کل طلب کرلیا ہے ۔ذرائع کا کہنا ہے کہ حکومتی و اتحادی ارکان کو پارلیمانی پارٹی اجلاس میں
شرکت کی ہدایت کی گئی ہے ۔وزیراعظم کی تمام اراکین قومی اسمبلی کو ہفتہ کے اجلاس میں حاضری یقینی بنانے کی بھی ہدایت کی ، ذرائع کا کہنا ہے کہ خیبرپختونخوا سے تعلق رکھنے والے اراکین قومی اسمبلی کا ہنگامی اجلاس پختونخواہ ہاوس میں طلب کیا گیا ہے ۔ اجلاس میں ہفتہ کو پارلیمنٹ کے خصوصی سیشن سے متعلق مشاورت کی جائے گی، علاوہ ازیں وزیر اعظم عمران خان کی جانب سے قومی اسمبلی سے اعتماد کا ووٹ لینے کے فیصلے کے پیش نظر تمام حکومتی اور اتحادی جماعتوں کے اراکین کو اسلام آباد سے باہر جانے سے روک دیاگیا ہے اور اس حوالے سے وزیر اعظم نے چیف وہپ عامر ڈوگر کو ہدایات جاری کر دی ہیں کہ وہ ہر ایم این اے سے خود رابطہ کریں اور انہیں اسلام آبادمیں ہی رہنے کے حوالے سے کہا جائے کیونکہ آئندہ چند روز میں قومی اسمبلی کا خصوصی اجلاس ہوگا جس میں وزیر اعظم اعتماد کا ووٹ لیںگے۔ذرائع کے مطابق چیف وہپ عامر ڈوگر نے تمام پی ٹی آئی اراکین کو وزیر اعظم کا پیغام پہنچا دیا ہے اور یہ بھی ہدایات جاری کی ہیں کہ تمام ارکان طلب ہونے والے پارلیمانی پارٹی کے اجلاس میں بھی شرکت کریں اور کوئی بھی رکن موجودہ صورت حال میں اسلام آباد سے باہر نہ جائے ۔
