لاہور(ا ین این آئی)ترجمان پنجاب حکومت مسرت جمشید چیمہ نے کہا ہے کہ کھوکھر برادران شریف خاندان کی اے ٹی ایم ہیں،قانون کی گرفت سے بچنے کیلئے آل شریف کی چھتری کے نیچے رہے، چھتر چھایہ کی وجہ کھوکھر برادران سالوں سے جاتی امراء کے تمام اخراجات برداشت کررہے ہیں۔ اپنے بیان میں انہوں نے کہا کہ مریم صفدر

اپنے اہل و عیال کے ہمراہ پارٹی کے اور کسی رہنما کے گھر کی صبح و شام یاترا کے لئے نہیں جاتیں، کھوکھر برادران آل شریف کی آشیر باد کی وجہ سے سالہا سال سے اربوں کی سرکاری زمین پر قابض تھے۔ انہوں نے کہا کہ مریم صفدر صرف کھوکھر برادران جیسے قبضہ گروپ کے دفاع کیلئے ٹوئٹر پر پیش پیش نظرآتی ہے ہیں، حکومت نے کسی کو سیاسی انتقام کا نشانہ نہیں بنایا بلکہ ان کے کالے کرتوتوں کی وجہ سے ریاست نے آپریشن کیا، وزیر اعظم کی واضح ہدایات ہیں حکومت کسی قبضہ گروپ اور غنڈہ عناصر سے کوئی رعایت نہ برتی جائے۔دوسری جانب پاکستان مسلم لیگ (ن) سندھ کے صدر شاہ محمد شاہ،جنرل سیکرٹری ڈاکٹر مفتاح اسماعیل اور سیکرٹری اطلاعات خواجہ طارق نذیر نے کھوکھر پیلس کے اطراف تعمیرات کو مسمار کرنے کو ریاست دہشت گردی قرار دیتے ہوئے کہا ہے کہ سلیکٹڈ،نااہل اور نالائق حکمران بغض نواز شریف میں اندھے ہوگئے ہیں۔پیرکو جاری اپنے مذمتی بیان میں مسلم لیگی رہنماؤں نے کہا کہ کھوکھر برادران کو وفاداریاں تبدیل نہ کرنے کی سزا دی گئی ہے۔حکم امتناع کے باوجود انتقامی کارروائی توہین عدالت اور قانون کی دھجیاں اڑانے کے مترادف ہے۔انہوں نے کہا کہ حکومت اپنی نااہلی، نالائقی و کرپشن پر پردہ ڈالنے کے لئے اوچھے ہتھکنڈوں پر اتر آئی ہے۔ریاست

مدینہ کے داعی نے اس سے پہلے غریبوں کے گھر مسمار کئے اور اپنا ناجائز محل ریگولرائز کروا لیا۔غریب کا پاکستان اور ریاست مدینہ کے داعی کا پاکستان اور ہے۔مسلم لیگی رہنماؤں نے کہا کہ ظلم، جبر،ناانصافی اور اوچھے ہتھکنڈے کارکنوں کے حوصلوں کوپست نہیں کرسکتے۔حکومت غربت، مہنگائی،بیروزگاری پر قابو پانے کے بجائے سرکس لگا کر عوام کی توجہ حقیقی مسائل سے ہٹانے کی ناکام کوشش کررہی ہے۔

موضوعات:کھوکھر برادران