اسلام آباد(مانیٹرنگ + این این آئی) وفاقی وزیرسائنس اینڈٹیکنالوجی فواد چوہدری نے ایک انٹرویو میں کہا کہ پاکستان آئندہ چند ماہ میں گیمنگ انڈسٹری میں قدم رکھ دے گا،وفاقی وزیر کا کہنا تھا کہ زراعت، الیکٹرانک اور کیمیکل شعبوں میں ٹیکنالوجی پر توجہ مرکوز ہے، بھنگ کے پودے سے دھاگہ بھی تیار کرلیا گیا جس 50سے 60 ملین ڈالرز کی ایکسپورٹ ہو سکے گی، آئندہ سال5

لائسنس جاری کر نے کا عندیہ بھی دیا،انہوں نے کہا کہ پاکستان میں موبائل بنانے والی پہلی فیکٹری لاہور میں قائم ہوچکی۔ دوسری جانب وفاقی وزیر سائنس اینڈ ٹیکنالوجی فواد چوہدری نے میڈیا سے بات چیت کرتے ہوئے کہا کہ شریف فیملی کے افراد جلد پاکستان واپس آئیں گے۔انہوں نے کہا کہ جنازوں، انتقال پر نہ سیاست کرتے ہیں اور نہ اسے اچھا سمجھتے ہیں، پی ڈی ایم والے لوگوں کی زندگیاں خطرے میں ڈال کر جلسے کرنے نکلے ہیں۔انہوں نے کہا کہ دن بہ دن معاشی حالات بہتر ہونے سے اپوزیشن کی سیاست دفن ہورہی ہے، ملتان میں جو کچھ ہورہا ہے وہ ٹھیک نہیں قابل افسوس ہے، حکومت نے ساری اپوزیشن کو جیل میں ڈالا تو کہیں گے جمہوریت خطرے میں ہے۔فواد چوہدری نے کہا کہ حکومت نے اگر کارروائی نہ کی تو لوگوں کی زندگیوں کو خطرہ ہوگا، پنجاب حکومت کیلئے مشکل فیصلے کی گھڑی ہے، اپوزیشن کو تھوڑی بھی عقل ہوتی تو لوگوں کی زندگیوں کی پرواہ کرتی۔وفاقی وزیر نے کہا کہ اشیا خوردونوش کی قیمتوں میں کمی آرہی ہے اور اپوزیشن کی پریشانی بڑھ رہی ہے، سہولت بازار میں 20 کلو آٹا 840 روپے کا ہے، چینی کی قیمت میں 15 روپے کمی آئی۔واضح رہے کہ وزیراعلیٰ پنجاب عثمان بزدار نے کل ملتان میں پی ڈی ایم کو جلسے کی اجازت نہ دینے کا فیصلہ کیا ہے، عثمان بزدار کا کہنا تھا کہ کسی کو ریاست کی رٹ چیلنج کرنے نہیں دیں گے، مسترد عناصر نے پہلے کرپشن کی اب کورونا پھیلا رہے ہیں۔

موضوعات:فواد چوہدری