کراچی (این این آئی) سندھ کے ضلع قمبر شہداد کوٹ میں بااثر وڈیرے کے بیٹے اور اس کے ساتھیوں نے کبوتر پکڑنے پر عمر رسیدہ خاتون کے بال کاٹ دیے اور ان کے منہ پر کالک مل دی۔ذرائع کے مطابق قمبر شہداد کوٹ کے گاں کھوڑی بازار تھانہ ڈرگھ کی حدود میں پیش آیا

جہاں بااثر وڈیرے کے بیٹے نے اپنے 6 ساتھیوں کے ساتھ مل کر عمر رسیدہ خاتون کو انسانیت سوزسلوک کا نشانہ بنایا۔خاتون کی شناخت کاملہ تونیو کے نام سے ہوئی جنہوں نے اے آر وائی نیوز کو بتایا کہ ان کے صاحبزادے نے وڈیرے کے بیٹے کا کبوتر پکڑ لیا تھا جس کے بعد 7 افراد نے ان کے گھر پر حملہ کیا۔وڈیرے کے بیٹے اور اس کے 6 دوستوں نے خاتون کو بہیمانہ تشدد کا نشانہ بنایا، بعد ازاں بال کاٹے اور ان کے چہرے پر کالک بھی مل دی۔ پولیس نے خاتون کی مدعیت میں واقعے کا مقدمہ7افراد کے خلاف درج کرلیا جس میں بااثر شخص کے بیٹے کو بھی نامزد کیا گیا۔کاملہ تونیو کے مطابق بااثر شخص کے بیٹے اور اس کے ساتھیوں نے گھر (جگھی)کو بھی نذر آتش کردیا۔ اے آر وائی نیوز نے معاملہ اٹھایا تو ایس ایس پی عمران قریشی نے خاتون سے رابطہ کیا اور انہیں طلب کرلیا۔پولیس نے مقدمہ درج ہونے کے بعد ملزمان کی گرفتاری کے لیے چھاپے مارے، 6 ملزمان پہلے ہی فرار ہوگئے جبکہ ایک ملزم فضل محمد تونیو کو پولیس نے حراست میں لے لیا۔