لاہور (ا ین این آئی) ذی الحج 1439ھ کا چاند دیکھنے کیلئے رویت ہلال کمیٹی کا اجلاس 12اگست بروز اتوار بمطابق 29ذیقعد کو طلب کر لیا گیا جبکہ ماہرین فلکیات نے بھی چاند اتوار کو نظر آنے کی پیشگوئی کر دی ہے ۔ذی الحج کا چاند دیکھنے کیلئے مرکزی رویت ہلال کمیٹی کا اجلاس محکمہ موسمیات کمپلیکس کراچی میں مرکزی چیئر مین مفتی منیب الرحمن کی زیر صدارت منعقد ہو گا جبکہ زونل کمیٹیوں کے اجلاس اسی

روز انکے مقررہ مقامات پر منعقد ہوں گے جن میں ذی الحج کا چاند نظر آنے یا نہ آنے کا اعلان کیا جائے گا۔ ماہر فلکیات نے پیشگوئی کی ہے کہ ذی الحج کا چاند 12 اگست بروز اتوار کی شام نظر آئے گا جس کے باعث یکم ذی الحج 13 اگست بروز پیر اور عید الاضحی 22 اگست بروز بدھ بمطابق 10 ذ ی الحج کو ہوگی جبکہ اس بار پاکستان اور سعودی عرب میں بدھ کو ایک ہی روز عید قربان ہونے کا بھی امکان ہے۔