اسلام آباد(مانیٹرنگ ڈیسک)عام انتخابات 25جولائی کو ہونگے اور اس حوالے سے الیکشن کمیشن نے انتخابی شیڈول جاری کر دیا ہے ۔ انتخابی شیڈول سامنے آنے کے بعد انتخابی امیدواروں نے انتخابی مہم تیز کر دی ہے اور اب عام انتخابات میں چند روز باقی رہ گئے ہیں اور انتخابی سرگرمیاں اپنے عروج پر پہنچ چکی ہیں۔ انتخابی امیدوار جہاں ووٹرز کو متاثر کرنے کیلئے اپنے نظریات کا پرچار ،

منشور اور پارٹی پالیسیوں کے ساتھ اپنے سابقہ دور میں کئے گئے کاموں کی تفصیلات عوام کے سامنے رکھ رہے ہیں وہیں کئی امیدوار ناجائز ذرائع سے بھی اپنے ووٹ بینک میں اضافے کی کوششوں میں مصروف ہیں۔ اس حوالے سے خیبر پختونخواہ کے حلقہ پی کے 49 سے ایسی خبر آگئی ہے کہ جان کر آپ بھی دنگ رہ جائیں گے۔ذرائع کے مطابق حلقے میں آزاد امیدوار عدنان خان نے ووٹوں کی خریدوفروخت شروع کرتے ہوئے ووٹو ں کے بدلے موٹر سائیکل اور رکشے کا پیکج متعارف کروا دیا ہے۔ اس حوالے سے ایک خاص تعداد میں ووٹ دینے والے کو موٹر سائیکل اور رکشہ دیا جا رہا ہے جبکہ فی ووٹ پانچ ہزار روپے دئیے جا رہے ہیں۔ آزاد امیدوار عدنان خان کا نام عدنان پانچ ہزار والا مشہور ہو گیا۔ واضح رہے کہ آزاد امیدوار عدنان خان سینٹر دلاورِخان کے بیٹے ہیں‎۔واضح رہے کہ الیکشن کمیشن نے عام انتخابات میں حصہ لینے والے امیدواروں کیلئے انتخابی ضابطہ اخلاق بھی جاری کر رکھا ہے اور اس حوالے سے شکایات موصول ہونے پر الیکشن کمیشن عمران خان، پرویز خٹک، ایاز صادق اور فضل الرحمن کو نازیبا زبان کے استعمال پر طلبی کے نوٹسز بھی جاری کر چکا ہے۔جبکہ اس سے قبل کے انتخابات میں بھی اسی قسم کی کئی شکایات میڈیا پر رپورٹ ہو چکی ہیں ۔جبکہ کئی مقامات پر اس کے واضح ثبوت بھی سامنے آئے تھے ۔

موضوعات:پی کے 49 عدنان خان ووٹوں کی خریدوفروخت