اسلام آباد(مانیٹرنگ ڈیسک)عراقی ٹی وی چینل کی خاتون میزبان اپنا پروگرام شروع کرتے ہوئے شدید غمگین ہو گئیں ۔ تفصیلات کے مطابق عراقی پروگرام اینکر سحرعباس اسکرین پر آن ائیر ہوئیں تو وہ شدید غم اور رنج کی کیفت میں مبتلا تھیں انہوں نے اپنے غم کی وجہ شیئر کرتے ہوئے بتایا کہ پروگرام شروع کرنے سے
کچھ لمحے قبل انہیں اپنے بڑے بھائی میجر جنرل طارق عباس کی موت کی خبر ملی جس کی وجہ سے وہ اس کیفیت کا شکار ہیں ۔ جس پر انہوں نے ناظرین سے معافی مانگی کہ وہ آن ائیر ہونے کے بعد بھی اپنے جذبات پر قابو نہیں رکھ سکیں ۔ سحر عباس نے بھائی کی موت کی خبر ملنے کے باوجود پروگرام پیش کرنے کا فیصلہ برقرار رکھا تاکہ ملک میں پیش آنے والے کسی بھی قسم کے تازہ واقعات سے اپنے دیکھنے والے ناظرین کو باخبر رکھا جائے ۔ واضح رہے کہ اس سے قبل بھی بھارت کی خاتون نیوز اینکر بھی حادثے کی خبر ناظرین کیساتھ شیئر کرتے ہوئےغمزدہ ہو گئیں کہ جس حادثے کے بارے میں وہ بات کر رہی ہیں اس میں ہلاک ہونے والا کوئی اور نہیں بلکہ ان کا شوہر ہے جو کسی کام سے دوسرے شہر گیا تھا ۔ جب گاڑی اور دیگر تفصیلات سامنے آئیں تو ان کی آنکھوں میں آنسو آگئے لیکن انہوں نے بڑے صبر و تحمل کیساتھ خبر مکمل کی اور خود پر کیمرہ ہٹتے ہی پھوٹ پھوٹ کر رو پڑیں تھی ۔
