اسلام آباد(مانیٹرنگ ڈیسک) برطانوی پارلیمنٹ سے خطاب کرنا کوئی خودکار عمل نہیں کہ آئے اور خطاب کر لیا بلکہ یہ وہ عزت ہے جو حاصل کرنا پڑتی ہے، برطانوی پارلیمنٹ کے سپیکر امریکی صدر ڈونلڈ ٹرمپ پر برس پڑے۔ تفصیلات کے مطابق برطانوی پارلیمنٹ کے سپیکر جان برکائو اراکین پارلیمنٹ سے گفتگو کے دوران امریکی صدر ڈونلڈ ٹرمپ پر برس پڑے

اور برطانوی پارلیمنٹ سے امریکی صدر کے خطاب کو یکسر مسترد کرتے ہوئے اجازت دینے سے انکار کر دیا ہے۔ان کا کہنا تھا کہ برطانوی پارلیمنٹ سے خطاب کرنا کوئی خودکار عمل نہیں کہ آئے اور خطاب کر لیا بلکہ یہ وہ عزت ہے جسے حاصل کرنا پڑتا ہے جبکہ امریکی صدر برطانوی پارلیمنٹ کی نظر میں اہمیت کی حامل اقدار جیسے قانون کی پاسداری،عدالتوں کا احترام، نسلی و جنسی امتیاز سے بالاتر ہونا سے نابلد ہیں۔جان برکائو کا کہنا تھا کہ وہ امریکی صدر کے تارکین وطن پر پابندی کے حکم نامے سے پہلے بھی ان کے برطانوی پارلیمنٹ سے خطاب کے مخالف تھے تاہم اس پابندی کے بعد اس کے شدید ترین مخالف ہو گئے ہیں اس لئے انہیں شاہی گیلری کا دعوت نامہ نہیں بھیجنا چاہئے۔

موضوعات:برطانیہ