بھارت  میں کورونا وائرس کیخلاف کام کرنیوالوں کو منفردخراج تحسین جانتے ہیں ایک ساتھ کتنے گلوکاروں نےمشترکہ  گانا ریلیز کردیا؟

  پیر‬‮ 18 مئی‬‮‬‮ 2020  |  17:01

ممبئی( آن لائن)بھارت  میں معروف گلوکارہ آشا بھوسلے سمیت 211 گلوکاروں کا گایا ہوا گانا 'جائتو جائتو بھارتم، واسودیو کٹمبکم' ریلیز کیا گیا ہے۔ تجربہ کار گلوکارہ آشا بھوسلے نے 'جیاتو جائتو بھارتم، واسودیو کٹمبکم' کے عنوان سے 211 گلوکاروں کے ساتھ مشترکہ طور پر منفرد نغمہ سرائی کی ہے۔میڈیا رپورٹ کے  مطابق اس گانے میں مشکل وقت میں اتحاد کا درس دیا گیا ہے۔ ساتھ ہی کورونا وائرس سےحفاظت کے لیے مصروف لوگوں کو خراج بھی پیش کیا گیا ہے۔اس گانا کی پروڈیوسر انڈین سنگرز رائٹز ایسو سی ایشن ہے۔ جو گلوکاروں کی ملکی تنظیم ہے۔آشا بھوسلے نے بتایا


کہ 'میں نے اپنی حکومت سے یہ التجا کی کہ میں ضرورت کے وقت قوم کی کس طرح مدد کرسکتی ہوں۔ چونکہ نقل و حرکت کی اجازت نہیں ہے، لہذا مجھے صحیح طریقے سے گھر میں رہنے اور محفوظ رہنے کو کہا گیا تھا۔ گھر بیٹھے مجھے بھی بے چینی محسوس ہوئی'۔ انھوں نے کہا ہے کہ 'میں نے محسوس کیا کہ ہمیں قوم کو بیدار رکھنے نیز انہیں تفریح فراہم کرنے کے لئے کوئی گانا گانا چاہئے۔ اسی لیے ایک گانے کے لئے متعدد گلوکاروں کے ساتھ مل کر کام کرنا شروع کیا'۔  رپورٹ کے مطابق یہ گانا 14 مختلف زبانوں میں ہے اور آشا بھوسلے نے اسے سنسکرت میں گایا ہے۔ انہوں نے اس تناظر میں کہا کہ 'بھارت کی بہت سی زبانیں سنسکرت سے پیدا ہوئی ہیں'۔گانے کی ریکارڈنگ کے بارے میں بات کرتے ہوئے انہوں نے کہا کہ 'یہ سب سے مشکل حصہ تھا۔ ہم سب بھارت کے مختلف حصوں میں محصور ہیں اور اس کے باوجود ہم نے کسی نہ کسی طرح ٹیکنالوجی کی مدد سے انتظام کیا۔ ہمارے پاس پیشہ ور اسٹوڈیوز، سازوسامان یا تکنیکی ماہرین نہیں تھے'۔


موضوعات: