اسلام آ باد(آن لائن )اسلام آبادوویمن چیمبر کی بانی صدرثمینہ فاضل نے کہا ہے کہ بجٹ آئی ایم ایف کی امنگوں کا ترجمان ہے جس نے عوام اور کاروباری برادری کو ہراساں کر دیا ہے۔بجٹ ہماری توقعات کے خلاف ہے جس سے عام آدمی کی مشکلات میں مزید اضافہ ہو گیاہے۔ بجٹ کے اثرات نے عوام اور معیشت کو اپنی لپیٹ میں لینا شروع کر دیا ہے۔بجٹ میں محاصل کی شرح زمینی حقائق سے

زیادہ توقعات پر مبنی ہے جس سے نجی شعبہ کا استحصال بڑھ جائے گا جو اسے مزید کمزور کر دے گا۔ثمینہ فاضل نے خواتین کے ایک اجلاس سے خطاب کرتے ہوئے کہا کہ ایف بی آر کے لئے پچپن سو ارب روپے کے محاصل جمع کرنا ممکن ہو گا۔ انھوں نے کہا کہ صنعت اور زراعت تباہ اور کھانے پینے کی تمام چیزیںمسلسل مہنگی ہو رہی ہیں جس سے عوام پر دبائو بڑھ رہا ہے۔ آمدنی کے بجائے منافع پر ٹیکس لگانے کی ضرورت ہے۔بجٹ اقدامات سے غیر قانونی بینکاری مایوسی وکرپشن کے نئے دور کا آغاز ہو گا۔گردشی قرضے کے خاتمہ کے اعلانات کئے جا رہے ہیں مگر ملک کا انرجی مکس بہتر بنائے بغیر یہ کوششیں لا حاصل ہیں۔ اکنامک منیجرز نے مہنگائی کے جن کو بوتل سے نکال دیا ہے جو بے قابو ہو کر غریب اور متوسط طبقہ کی مشکل زندگی ناممکن بنا رہا ہے ،مہنگائی سے چائلڈ لیبر میں اضافہ ہو گا۔مہنگائی سے سب سے زیادہ خواتین متاثرہوتی ہیں جو اپنے بچوں کی غذائیت برقرار رکھنے کے لئے خود فاقے کرنا شروع کر دیتی ہیں۔آبادی کی اکثریت پبلک ٹرانسپورٹ اور موٹر سائیکل استعمال کرتی ہے جن پر مزید ٹیکس لگانا ظلم ہے۔

موضوعات:صدراسلام آباد وو یمن چیمبر