لاہور( این این آئی )ایشیائی ترقیاتی بینک نے پاکستان کی سماجی صورتحال پر رپورٹ جاری کردی جس کے مطابق پاکستان رشوت ستانی کے لحاظ سے دنیا میں دسویں نمبر پر ہے جبکہ گندے پانی اور صفائی کے ناقص انتظامات سے پاکستان میں ہلاکتوں کی شرح خطے میں سب سے زیادہ ہے۔نجی ٹی وی کے مطابق ایشیائی ترقیاتی بینک نے پاکستان کی سماجی صورتحال رپورٹ جاری کردی ہے جس کے مطابق سماجی اعشارئیوں میں پاکستان کی کارکردگی مایوس کن رہی ہے۔

رشوت ستانی میں پاکستان 32 ممالک میں سے 10ویں نمبر پر ہے۔ گزشتہ دس سالوں میں بغیر سزا کے پاکستانی جیلوں میں قید قیدیوں کی شرح میں بھی اضافہ ہوا ہے جبکہ مقدموں کے فیصلوں کے منتظر قیدیوں کی شرح 58 فیصد سے بڑھ کر 69 فیصد ہوگئی ہے جو کہ انتہائی تشویشناک ہے۔گندے پانی اور صفائی کے ناقص انتظامات سے پاکستان میں ہلاکتوں کی شرح خطے میں سب سے زیادہ ہے۔ سہولیات کے فقدان سے ایک لاکھ میں سے 20 افراد مر جاتے ہیں۔ پاکستان میں بیروزگاری کی شرح 6 فیصد کے لگ بھگ ہے۔ رپورٹ کے مطابق گلوبل گولز 2030 کیلئے پاکستان کو 7سالوں میں 74 کروڑ 40 لاکھ ڈالرز امدادی رقم ملی۔ایشیائی ترقیاتی بینک نے کہا ہے کہ پاکستان میں دوران زچگی ایک لاکھ میں سے 8خواتین مر جاتی ہیں، جبکہ ایشیا ء میں سب سے کم پاکستانی خواتین انتظامی عہدوں پر فائز ہیں۔ رپورٹ کے مطابق پاکستان میں ٹریفک حادثے سے ہلاک ہونے والوں کی شرح میں کمی ہوئی ہے۔ ایشیائی ترقیاتی بینک کے مطابق پاکستان رشوت ستانی کے لحاظ سے دنیا میں دسویں نمبر پر ہے جبکہ گندے پانی اور صفائی کے ناقص انتظامات سے پاکستان میں ہلاکتوں کی شرح خطے میں سب سے زیادہ ہے

موضوعات:ایشیائی ترقیاتی بینک