تہران (این این آئی)ایران کے دارالخلافہ تہران میں کفن پہنے شخص کی ایوان صدر میں زبردستی گھسنے کی کوشش پر ایرانی سیکیورٹی فورسز کی فائرنگ سے مشتبہ شخص زخمی ہوگیا۔فرانسیسی میڈیاکے مطابق تہران کے ڈپٹی گورنر برائے سیکیورٹی محسن حمدانی نے بتایا کہ کفن پہنے شخص نے دروازوں کو دھکا دیتے ہوئے ایوان صدر میں گھسنے کی کوشش کی تھی جس پر سیکیورٹی گارڈ نے اسے خبر دار کیا تھا۔انہوں نے کہاکہ مشتبہ شخص کو مزید آگے بڑھنے

سے روکنے کے لیے پولیس نے اس پر فائرنگ کی۔انہوں نے کہا کہ حکام مشتبہ شخص کی شناخت اور اس کے مقاصد جاننے کی کوشش کر رہی ہے۔میڈیا رپورٹ کے مطابق ان کو ایک فون کال موصول ہوئی جس میں انہیں بتایا گیا کہ مشتبہ شخص کے پاس چاقو بھی تھی۔