اسلام آباد(نیوز ڈیسک) چیئرمین پاکستان کرکٹ بورڈ محسن نقوی نے جشنِ آزادی کے موقع پر کرکٹ مداحوں کے لیے خصوصی سرپرائز دینے کا اعلان کردیا۔
سوشل میڈیا پلیٹ فارم ایکس پر اپنے پیغام میں محسن نقوی نے کہا کہ نیشنل چیمپئنز کپ کے مقابلے جاری ہیں جہاں شائقین کو اپنے پسندیدہ قومی کرکٹرز کو ایکشن میں دیکھنے کا موقع مل رہا ہے۔انہوں نے بتایا کہ شاداب خان، صاحبزادہ فرحان، فخر زمان سمیت کئی معروف کھلاڑی ٹورنامنٹ کا حصہ ہیں اور میدان میں اپنی صلاحیتوں کا مظاہرہ کر رہے ہیں۔
محسن نقوی نے کرکٹ شائقین کو اہل خانہ اور دوستوں کے ہمراہ ملتان کرکٹ اسٹیڈیم پہنچ کر میچز دیکھنے کی دعوت بھی دی۔ ان کے مطابق اسٹیڈیم میں شائقین کا داخلہ دوپہر 3 بجے سے مفت ہوگا۔چیئرمین پی سی بی نے مزید اعلان کیا کہ جشنِ آزادی کی مناسبت سے آج رات 10 بجے شائقین کے لیے ایک خصوصی سرپرائز بھی رکھا گیا ہے۔
