لزبن (این این آئی)کرسٹیانو رونالڈو اور جارجینا روڈریگز کی 11 اگست کو قریبی اہل خانہ اور دوستوں کی موجودگی میں نجی تقریب میں ہونے والی شادی کے بعد کچھ اہم تفصیلات سامنے آگئیں۔

غیر ملکی میڈیا رپورٹس میں انکشاف کیا گیا ہے کہ کرسٹیانو اور جارجینا کی شادی کی دستاویزات کے مطابق دونوں نے علیحدہ جائیداد کے نظام کے تحت شادی کی ہے جس کے تحت دونوں اپنی ذاتی دولت، آمدنی اور سرمایہ کاری کے الگ الگ مالک رہیں گے۔رپورٹس کے مطابق پرتگالی قانون کے تحت اس معاہدے کا مطلب ہے کہ شادی سے پہلے یا شادی کے دوران حاصل کیے گئے اثاثے خود بخود مشترکہ ملکیت نہیں بنیں گے، طلاق کی صورت میں بھی جائیداد کی خودکار تقسیم نہیں ہوگی۔ایک پرتگالی جریدے کی رپورٹ میں دعوی کیا گیا ہے کہ علیحدگی یا طلاق کی صورت میں جارجینا کو رونالڈو کی جانب سے ماہانہ تقریبا 100000 یورو بطور نان نفقہ ملیں گے جبکہ میڈرڈ کے علاقے لا فِنکا میں موجود جوڑے کی پرتعیش رہائش گاہ بھی جارجینا کی ملکیت میں رہے گی۔ اس مکان کی مالیت 5.6 ملین ڈالر سے زائد بتائی گئی ہے۔رونالڈو کی اپنی آمدنی، معاہدوں، تشہیری معاہدوں، سعودی کلب النصر سے حاصل ہونے والی رقم اور کاروباری منصوبوں، بشمول پیستانا کرسٹیانو رونالڈو ہوٹل پر بھی انفرادی ملکیت برقرار رہے گی۔رپورٹ کے مطابق جوڑے کے پانچوں بچے شادی کی تقریب میں شریک تھے۔

رونالڈو کے قریبی دوست میگل پائیشا اور جارجینا کی بہن ایوانا روڈریگز بطور گواہ موجود تھے، تقریب میں پرتگال کی قومی ٹیم یا النصر کے کسی نمایاں کھلاڑی کی شرکت کی اطلاع نہیں ملی۔رپورٹس کے مطابق دونوں نے شادی کے بعد اپنے خاندانی نام تبدیل نہ کرنے کا فیصلہ کیا ہے۔ اس سے قبل یہ افواہیں بھی گردش کرتی رہی ہیں کہ شادی کی بڑی تقریب مادیرا کے شہر فنشال کے گرجا گھر میں ہوگی جس کے باعث وہاں مداحوں اور میڈیا کی بڑی تعداد جمع ہو گئی تھی تاہم تقریب یا استقبالیہ کے مقام کے حوالے سے تاحال کوئی باضابطہ اعلان نہیں کیا گیا۔بین الاقوامی میڈیا رپورٹس کے مطابق رونالڈو اور جارجینا نے شادی کی تفصیلات کو انتہائی راز میں رکھا ہے۔