اسلام آباد (نیوز ڈیسک)پاکستان کے اولمپک چیمپئن جیولین تھروور ارشد ندیم نے کامن ویلتھ گیمز میں توقعات کے مطابق کارکردگی نہ دکھا پانے کی وجوہات بیان کرتے ہوئے کہا ہے کہ گلاسکو کا سخت سرد موسم ان کی کارکردگی پر اثرانداز ہوا۔
کامن ویلتھ گیمز میں اپنے اعزاز کا دفاع نہ کر سکنے کے بعد وطن واپس پہنچنے پر ارشد ندیم نے میڈیا سے گفتگو کرتے ہوئے قوم سے معذرت کی۔ انہوں نے کہا کہ وہ شائقین کی امیدوں پر پورا نہ اترنے پر دلی افسوس کا اظہار کرتے ہیں، تاہم کھیل میں ہر کھلاڑی کے لیے اچھے اور مشکل دن آتے رہتے ہیں۔
ارشد ندیم کے مطابق انہوں نے ایونٹ سے قبل پاکستان کے گرم ماحول میں بھرپور تیاری کی تھی، لیکن گلاسکو پہنچنے پر شدید سردی اور ٹھنڈی ہواؤں نے ان کی جسمانی حالت کو متاثر کیا۔ ان کا کہنا تھا کہ موسم کی سختی کے باعث جسم میں اکڑاؤ پیدا ہوگیا، جس سے وہ اپنی مکمل صلاحیت کے ساتھ تھرو نہ کر سکے۔
انہوں نے مزید بتایا کہ سرد موسم کی وجہ سے ان کا رن اپ بھی معمول کے مطابق نہ بن سکا، جس کا براہِ راست اثر ان کی کارکردگی پر پڑا۔
اولمپک گولڈ میڈلسٹ کا کہنا تھا کہ ہر کھلاڑی میدان میں کامیابی حاصل کرنے کی نیت سے اترتا ہے اور وہ بھی پوری محنت اور جذبے کے ساتھ مقابلے میں شریک ہوئے تھے، مگر نتائج ہمیشہ انسان کے اختیار میں نہیں ہوتے۔ انہوں نے کہا کہ انہوں نے اپنی بھرپور کوشش کی، لیکن اس بار کامیابی ان کے حصے میں نہیں آ سکی۔
