اسلام آباد (نیوز ڈیسک)کامن ویلتھ گیمز میں قومی جیولن تھرو اسٹار اور اولمپک گولڈ میڈلسٹ ارشد ندیم کی توقعات سے کم کارکردگی کے بعد
پاکستان اتھلیٹکس فیڈریشن (اے ایف پی) نے معاملے پر باضابطہ اقدامات کرنے کا فیصلہ کیا ہے۔ فیڈریشن حکومتی اداروں کو اس حوالے سے تفصیلی رپورٹ ارسال کرے گی۔
نجی ٹی وی کی رپورٹ کے مطابق فیڈریشن ذرائع کا کہنا ہے کہ جلد ہی حکومت، بین الصوبائی رابطہ (آئی پی سی) ڈویژن اور پاکستان اسپورٹس بورڈ (پی ایس بی) کو ایک خط بھیجا جائے گا، جس میں ارشد ندیم کی تیاری، کوچنگ کے انتظامات اور دیگر متعلقہ امور سے آگاہ کیا جائے گا۔
ذرائع کے مطابق ارشد ندیم نے گزشتہ کامن ویلتھ گیمز اور پیرس اولمپکس سے قبل پاکستان اتھلیٹکس فیڈریشن کی نگرانی میں تربیت حاصل کی تھی، جس کے نتیجے میں انہوں نے نمایاں کامیابیاں حاصل کیں۔ تاہم اس بار فیڈریشن کا دعویٰ ہے کہ تیاری کے دوران ایک غیر مستند کوچ کی نگرانی کے باعث قومی ایتھلیٹ اپنی بہترین کارکردگی کا مظاہرہ نہ کر سکے اور پاکستان چار سال بعد منعقد ہونے والے اس اہم ایونٹ میں اپنا اعزاز برقرار رکھنے میں ناکام رہا۔
فیڈریشن کے مطابق بعض انتظامی اختلافات اور چند افراد کی مبینہ مخالفت نے قومی مفاد کو نقصان پہنچایا، جس کے اثرات ٹیم کی مجموعی تیاری اور نتائج پر بھی پڑے۔
پاکستان اتھلیٹکس فیڈریشن کا کہنا ہے کہ وہ متعلقہ حکام کو تمام حقائق سے آگاہ کرے گی تاکہ آئندہ قومی ایتھلیٹس کی تربیت، کوچنگ کے معیار اور انتظامی امور کو مزید مؤثر بنایا جا سکے اور بین الاقوامی مقابلوں میں بہتر نتائج حاصل کیے جا سکیں۔
