اسلام آباد (نیوز ڈیسک) پرتگال کے مایہ ناز فٹبالر کرسٹیانو رونالڈو نے فیفا ورلڈ کپ کی تاریخ میں ایک اور منفرد اعزاز اپنے نام کر لیا۔
وہ دنیا کے پہلے کھلاڑی بن گئے ہیں جنہوں نے چھ مختلف ورلڈ کپ ٹورنامنٹس میں گول اسکور کرنے کا کارنامہ انجام دیا ہے۔ہیوسٹن میں کھیلے گئے مقابلے میں 41 سالہ رونالڈو نے ازبکستان کے خلاف میچ کے ابتدائی لمحات میں ہی گول کرکے نیا عالمی ریکارڈ قائم کیا۔ کھیل کے چھٹے منٹ میں جواؤ کینسلو کی شاندار پاس پر رونالڈو نے دائیں پیر سے گیند کو جال میں پہنچایا اور یوں فٹبال کی تاریخ میں اپنا نام مزید نمایاں کر لیا۔اس تاریخی گول کے بعد رونالڈو وہ پہلے فٹبالر بن گئے ہیں جنہوں نے مسلسل چھ ورلڈ کپ ایڈیشنز میں گول کرنے کا اعزاز حاصل کیا۔ انہوں نے 2006، 2010 اور 2014 کے ورلڈ کپ میں ایک، ایک گول کیا، 2018 کے ایونٹ میں چار مرتبہ گیند کو جال کی راہ دکھائی جبکہ 2022 میں بھی ایک گول اسکور کیا تھا۔اس کے علاوہ رونالڈو ورلڈ کپ کی تاریخ میں زیادہ عمر میں گول کرنے والے دوسرے کھلاڑی بھی بن گئے ہیں۔
اس فہرست میں پہلا نمبر کیمرون کے سابق فٹبالر راجر میلا کے پاس ہے، جن کا ریکارڈ اب بھی برقرار ہے۔دلچسپ امر یہ ہے کہ ارجنٹائن کے اسٹار فٹبالر لیونل میسی بھی اپنے چھٹے ورلڈ کپ میں شرکت کر رہے ہیں، تاہم وہ اب تک ہر ورلڈ کپ ایڈیشن میں گول کرنے کا اعزاز حاصل نہیں کر سکے۔
