لاہور( این این آئی)پاکستان سپر لیگ 11 کے فائنل میں پشاور زلمی نے حیدرآباد کنگزمین کو 5 وکٹوں سے شکست دے کر دوسری مرتبہ چمپئن بنے کا اعزاز حاصل کرلیا،
ایرون ہارڈی میچ کے بہترین کھلاڑی قرار پائے انہوں نے بولنگ میں 27 رنز دے کر 4 کھلاڑیوں کو میدان بدر کیا جبکہ بیٹنگ میں 56 رنز بنائے اور ناٹ آئوٹ رہے ۔ پشاور زلمی نے 5 مرتبہ پی ایس ایل کا فائنل کھیلنے کا اعزاز حاصل کیا اور 2 مرتبہ فتح حاصل کی ۔پاکستان سپر لیگ سیزن 11 کا فائنل پشاور زلمی اور حیدرآباد کنگزمین کی ٹیموں کے درمیان قذافی سٹیڈیم لاہور میں کھیلا گیا ۔ پشاور زلمی کے کپتان بابر اعظم نے ٹاس جیت کر فیلڈنگ کرنے کا فیصلہ کیا ۔ حیدرآباد کنگزمین پہلے بیٹنگ کرتے ہوئے اچھے کھیل کا مظاہرہ نہ کر سکی اور پوری ٹیم 18 اووروں میں 129 رنز بناکر آئوٹ ہوگئی ۔
صائم ایوب 50 گیندوں پر2 چھکوں اور 5 چوکوں کی مدد سے 54 رنز بناکر آٹ ہوئے دیگر کھلاڑیوں میں کپتان مارنس لیبوشگن20، حسن خان 12، معاذ صداقت 11، حنین شاہ 9 عثمان خان 8، عرفان خان اور کوسل پریرا ایک ،ایک سکور بنا کر آئوٹ ہوئے ،گلین میکسویل صفر پر آئوٹ ہوئے ۔ محمد علی ایک سکور بناکر ناٹ آئوٹ رہے ۔ پشاور زلمی کی جانب سے ارون ہارڈی نے 4، ناہید رانانے 2، محمد باسط اور سفیان مقیم نے ایک ،ایک کھلاڑی کو آئوٹ کیا ۔ 130 رنز کے ہدف کے حصول کے لیے بعد میں بیٹنگ کرتے ہوئے پشاور زلمی نے 15.2 اووروں میں 5 وکٹوں کے نقصان پر 130 رنز بناکر میچ جیت لیا ۔عبدالصمد 48، کوسل مینڈس9، محمد حارث 8، مائیکل بریسویل 4، کپتان بابر اعظم صفر پر آئوٹ ہوئے ۔ ایرون ہارڈی56 اور فرحان یوسف 4 رنز بناکر ناٹ آئوٹ رہے ۔محمد علی نے3، عاکف جاوید اور حنین شاہ نے ایک ،ایک کھلاڑی کو آئوٹ کیا ۔
