اسلام آباد (نیوز ڈیسک) پاکستان کرکٹ بورڈ (پی سی بی) نے زمبابوے کے فاسٹ بولر بلیسنگ مزارابانی پر سخت کارروائی کرتے ہوئے انہیں آئندہ دو ایڈیشنز میں شرکت سے روک دیا ہے۔
میڈیا رپورٹس کے مطابق یہ اقدام پاکستان سپر لیگ (پی ایس ایل) کے معاہدے کی خلاف ورزی پر اٹھایا گیا۔ پی سی بی کا کہنا ہے کہ کھلاڑی نے طے شدہ شرائط اور وعدوں کی پاسداری نہیں کی، جس کی وجہ سے یہ فیصلہ کیا گیا۔بورڈ کے مطابق پیشہ ورانہ کرکٹ میں معاہدوں اور باہمی اعتماد کو بنیادی حیثیت حاصل ہوتی ہے، تاہم متعلقہ کھلاڑی نے اپنی ذمہ داریوں کو پورا نہیں کیا۔ تحریری طور پر طے پانے والے معاہدے، جن میں معاوضہ اور دیگر شرائط شامل تھیں، ان پر عمل درآمد ضروری ہوتا ہے اور بغیر کسی ٹھوس وجہ کے ان سے پیچھے ہٹنا قواعد و ضوابط کی خلاف ورزی ہے۔
پی سی بی نے واضح کیا کہ وہ اپنے اخلاقی اور پیشہ ورانہ اصولوں پر کوئی سمجھوتہ نہیں کرے گا، اور دو سالہ پابندی اس خلاف ورزی کی سنگینی کو ظاہر کرتی ہے۔رپورٹس کے مطابق مزارابانی نے رواں سیزن میں اسلام آباد یونائیٹڈ کی نمائندگی پر آمادگی ظاہر کی تھی، لیکن بعد میں انہوں نے بھارتی لیگ کے ساتھ معاہدہ کر لیا، جس پر بورڈ نے قانونی کارروائی بھی کی۔یاد رہے کہ اس سے قبل بھی پی سی بی معاہدے کی خلاف ورزی پر جنوبی افریقی کھلاڑی کوربن بوش کے خلاف کارروائی کر چکا ہے۔
