اسلام آباد (نیوز ڈیسک)پاکستان کرکٹ بورڈ نے سینٹرل کنٹریکٹ، میڈیا پالیسی اور ضابطہ اخلاق کی خلاف ورزی کے الزام پر فاسٹ بولر نسیم شاہ کے خلاف باقاعدہ تادیبی کارروائی شروع کر دی ہے۔
بورڈ کے مطابق یہ نوٹس اس کے ڈسپلنری نظام کے تحت جاری کیا گیا ہے۔پی سی بی نے نسیم شاہ کو ہدایت کی ہے کہ وہ مقررہ مدت کے اندر اپنا تحریری جواب جمع کروائیں۔ ان کے مؤقف کا جائزہ لینے کے بعد بورڈ قواعد کے مطابق آئندہ اقدامات طے کرے گا۔ ترجمان کا کہنا ہے کہ ادارہ پیشہ ورانہ معیار، معاہدوں کی پابندی اور کھیل کے وقار کو ہر صورت برقرار رکھنے کے لیے سنجیدہ ہے اور کسی بھی خلاف ورزی کو نظر انداز نہیں کیا جائے گا۔یاد رہے کہ گزشتہ روز پاکستان سپر لیگ کی افتتاحی تقریب کے دوران وزیر اعلیٰ پنجاب مریم نواز قذافی اسٹیڈیم میں موجود تھیں۔
اسی موقع پر نسیم شاہ کے ایکس (ٹوئٹر) اکاؤنٹ سے ایک متنازع پیغام شیئر ہوا، جس میں پروٹوکول پر سوال اٹھایا گیا تھا۔ بعد ازاں یہ پوسٹ حذف کر دی گئی۔بعد میں نسیم شاہ کی جانب سے وضاحت جاری کی گئی کہ ان کا سوشل میڈیا اکاؤنٹ ہیک ہو گیا تھا، تاہم اب اسے بحال کر لیا گیا ہے۔
