لاہور (نیوز ڈیسک) پنجاب پولیس نے پاکستان سپر لیگ اور سال 2026 کے دوران مختلف مواقع پر سیکیورٹی انتظامات کے لیے بھاری فنڈز کی درخواست کی تھی،
تاہم حکومت نے مکمل رقم فراہم کرنے کے بجائے محدود بجٹ میں ہی انتظامات کرنے کی ہدایت جاری کر دی ہے۔ میڈیا رپورٹس کے مطابق پولیس حکام نے مجموعی طور پر تقریباً 3 ارب 30 کروڑ روپے کی مالی معاونت مانگی تھی، جبکہ سابقہ بقایا جات کی مد میں بھی قریب ایک ارب روپے کی ادائیگی کی درخواست دی گئی تھی۔ذرائع کا کہنا ہے کہ صرف پی ایس ایل کے سیکیورٹی انتظامات کے لیے تقریباً 2 ارب 28 کروڑ روپے درکار تھے، مگر حکومت نے مکمل مطالبے کے بجائے صرف 1 ارب 20 کروڑ روپے جاری کرنے کی منظوری دی۔
مزید بتایا گیا ہے کہ یہ منظور شدہ رقم صرف پی ایس ایل تک محدود نہیں بلکہ دیگر اہم مواقع کی سیکیورٹی پر بھی خرچ ہوگی، جن میں محرم الحرام اور ربیع الاول کے اجتماعات کے انتظامات شامل ہیں۔ اس کے علاوہ غیر قانونی افغان شہریوں کی واپسی سے متعلق سیکیورٹی اخراجات بھی اسی بجٹ میں شامل کیے گئے ہیں۔
