اسلام آباد (نیوز ڈ یسک) قومی کرکٹ ٹیم کے مایہ ناز بلے باز بابر اعظم نے ٹیم مینجمنٹ کے مشورے پر عارضی طور پر کرکٹ سے وقفہ لینے کا فیصلہ کیا ہے۔
ذرائع کے مطابق ٹیم مینجمنٹ نے بابر اعظم کو کچھ وقت آرام کرنے کا مشورہ دیا ہے، جس کے باعث وہ جاری نیشنل ٹی ٹوئنٹی کپ میں شرکت نہیں کریں گے۔ انہیں اس ٹورنامنٹ میں کھیلنے کے لیے ٹیم انتظامیہ کی جانب سے کوئی ہدایت بھی نہیں دی گئی۔اطلاعات کے مطابق بابر اعظم کی جانب سے لاہور وائٹس کی ٹیم کو اپنی عدم دستیابی کے بارے میں آگاہ کر دیا گیا ہے۔ذرائع کا کہنا ہے کہ بابر اعظم نے اس دوران اپنی فارم بہتر بنانے کے لیے کوچز کے ساتھ انفرادی طور پر نیٹس میں پریکٹس شروع کر دی ہے۔
وہ پاکستان سپر لیگ کو مدنظر رکھتے ہوئے باقاعدہ ٹریننگ کر رہے ہیں۔بتایا گیا ہے کہ بابر اعظم اپنی پرانی بیٹنگ تکنیک کو دوبارہ مؤثر بنانے کے لیے بھی کام کر رہے ہیں تاکہ آئندہ مقابلوں میں بہتر کارکردگی دکھا سکیں۔واضح رہے کہ بابر اعظم پاکستان سپر لیگ میں پشاور زلمی کی نمائندگی کرتے ہوئے اوپننگ بیٹر کے طور پر میدان میں اتریں گے۔
