اسلام آباد (نیوز ڈیسک) سابق قومی کپتان شاہد آفریدی نے سری لنکا کے خلاف میچ میں آخری اوور مہنگا ثابت ہونے پر اپنے داماد اور قومی ٹیم کے فاسٹ بولر شاہین شاہ آفریدی کو تنقید کا نشانہ بنایا ہے۔
نجی ٹی وی کے اسپورٹس پروگرام میں گفتگو کرتے ہوئے شاہد آفریدی نے کہا کہ شاہین کافی عرصے سے بین الاقوامی کرکٹ کھیل رہے ہیں، اس لیے انہیں یہ بخوبی معلوم ہونا چاہیے کہ فیصلہ کن اوور کس اینڈ سے کروانا بہتر ہوتا ہے۔ ان کے بقول یہ بات کئی بار سمجھائی جا چکی ہے، مگر اس کے باوجود وہ وہی غلطیاں دہرا رہے ہیں۔ انہوں نے تکنیکی پہلو پر بات کرتے ہوئے کہا کہ جب بیٹسمین دائیں ہاتھ سے کھیل رہا ہو تو راؤنڈ دی وکٹ بولنگ مناسب نہیں ہوتی، اور اگر ایسی حکمت عملی اپنانی بھی پڑے تو گیند آف اسٹمپ کے باہر نہیں بلکہ اندر رکھنی چاہیے۔
سابق کپتان کا کہنا تھا کہ سمجھ نہیں آتی کہ ہمارے بولرز کب ان بنیادی نکات کو سیکھیں گے۔ انہوں نے افسوس کا اظہار کرتے ہوئے کہا کہ کھلاڑیوں کو اجتماعی ذمہ داری کا احساس ہونا چاہیے، کیونکہ میچ صرف ایک یا دو افراد کے بل بوتے پر نہیں جیتے جا سکتے۔
شاہد آفریدی نے مزید کہا کہ عالمی کرکٹ تیزی سے ترقی کر رہی ہے، جبکہ ہماری ٹیم پیچھے رہتی جا رہی ہے، جس پر سنجیدگی سے غور کرنے کی ضرورت ہے۔
