اسلام آباد (نیوز ڈ یسک) بھارت کی ریاست اترپردیش میں ایک کرکٹ میچ کے دوران پیش آنے والے افسوسناک واقعے میں شہد کی مکھیوں کے حملے سے سینئر امپائر مانک گپتا جان کی بازی ہار گئے۔
میڈیا رپورٹس کے مطابق مانک گپتا کانپور کے کرکٹ حلقوں میں ایک معروف امپائر تھے اور کانپور کرکٹ ایسوسی ایشن سے وابستہ رہے تھے۔ واقعہ اناؤ کے سپرو اسٹیڈیم میں اس وقت پیش آیا جب میچ جاری تھا اور اچانک شہد کی مکھیوں کے جھنڈ نے میدان میں موجود افراد پر حملہ کر دیا، جس سے کئی کھلاڑی اور آفیشلز متاثر ہوئے۔مرحوم کے بھائی امیت کمار گپتا نے بتایا کہ میچ ختم ہونے کے بعد ڈرنکس بریک کے دوران مانک اپنے ساتھی امپائر سے ملنے گئے تھے کہ اسی لمحے مکھیوں نے حملہ کر دیا۔ بھاگنے کی کوشش میں وہ توازن برقرار نہ رکھ سکے اور گر پڑے، جس کے بعد مکھیوں نے انہیں گھیر لیا۔
ساتھی امپائر جگدیش شرما کے مطابق سب لوگ جان بچانے کے لیے دوڑے مگر عمر زیادہ ہونے کی وجہ سے مانک گپتا تیزی سے نہ بھاگ سکے اور حملے کی زد میں آ گئے۔ بتایا جاتا ہے کہ وہ تقریباً تین دہائیوں سے امپائرنگ کے شعبے سے وابستہ تھے اور ریاستی سطح کے پینل امپائر شمار ہوتے تھے۔
