اسلام آباد (نیوز ڈ یسک) آئی سی سی ٹی ٹوئنٹی ورلڈ کپ میں بھارت کرکٹ ٹیم سے شکست کے بعد

پاکستان کرکٹ ٹیم کے لیے سپر 8 مرحلے تک پہنچنے کی امیدیں آخری گروپ میچ سے وابستہ ہو گئی ہیں، جہاں فتح حاصل کرنا اب لازمی قرار پا گیا ہے۔بھارت کے ہاتھوں 61 رنز کی واضح شکست کے بعد گروپ اے سے بھارت اگلے مرحلے میں جگہ بنا چکا ہے، جبکہ اس نتیجے نے پاکستان کے نیٹ رن ریٹ کو شدید نقصان پہنچایا۔اس میچ سے قبل قومی ٹیم کا رن ریٹ مثبت 0.932 تھا جو ہار کے بعد کم ہو کر منفی 0.403 رہ گیا، اور اسی وجہ سے پوائنٹس ٹیبل پر وہ امریکہ سے بھی نیچے چلی گئی۔ امریکی ٹیم چار میچوں میں دو فتوحات کے ساتھ چار پوائنٹس اور 0.788 کے رن ریٹ کے ساتھ بہتر پوزیشن میں ہے۔پاکستان اپنا آخری گروپ مقابلہ 18 فروری کو نمیبیا کے خلاف کھیلے گا، اور اگلے مرحلے میں رسائی کے لیے اس میچ میں کامیابی ناگزیر سمجھی جا رہی ہے۔