اسلام آباد (نیوز ڈیسک) پاکستانی کرکٹر احمد شہزاد نے پاکستان سپر لیگ کے گیارہویں ایڈیشن کے لیے ٹیم میں شامل نہ کیے جانے پر

ایک ٹی وی پروگرام کے دوران اپنے جذبات کا اظہار کرتے ہوئے آنکھیں نم کر لیں۔نجی چینل کے مزاحیہ شو میں، جہاں وہ محمد عامر کے ہمراہ مہمان تھے، میزبان کے سوال پر انہوں نے کہا کہ ساتھی کھلاڑیوں کو میدان میں دیکھ کر انہیں خوشی تو ہوتی ہے مگر اپنے حوالے سے دل اداس ہو جاتا ہے۔ ان کا کہنا تھا کہ سب سے زیادہ تکلیف اس بات کی ہوتی ہے کہ ان کا نو سالہ بیٹا انہیں کھیلتے ہوئے دیکھنا چاہتا ہے۔بات کرتے ہوئے وہ جذباتی ہوگئے اور بتایا کہ ان کا بیٹا رات کو ان کے ساتھ سوتا ہے اور انہیں تسلی دینے کے لیے کہتا ہے کہ اسے یاد ہے کہ وہ کرکٹ کھیلتے تھے اور اب وہ انہیں بہتر انداز میں یاد رکھ سکے گا۔

احمد شہزاد نے مزید کہا کہ مجموعی طور پر وہ خود کو مطمئن رکھنے کی کوشش کرتے ہیں، لیکن یہ معاملہ ایسا ہے جو دل کو چھو جاتا ہے اور انہیں اندر سے افسردہ کر دیتا ہے۔