ملتان (این این آئی)ملتان سلطانز کے مالک علی ترین نے ٹیم سے علیحدگی کا اعلان کرتے ہوئے کہا ہے کہ سلطانز کا حصہ ہونا ان کی زندگی کا بڑا اعزاز رہا۔ جاری بیان میں علی ترین نے کہا کہ جنوبی پنجاب کی نمائندگی کرنا ان کے لیے ہمیشہ فخر کی بات رہی، جو ان کے مرحوم چچا عالمگیر ترین کی خواہش بھی تھی۔علی ترین نے کہا کہ وہ ہر سیزن میں کھلاڑیوں کو اس علاقے کی محنت، جدوجہد اور ہمت کے جذبے سے آگاہ کرتے رہے۔ ان کے مطابق شائقین ہار کو معاف کر دیتے ہیں لیکن لڑائی چھوڑ دینے کو کبھی معاف نہیں کرتے، یہی سوچ ٹیم کی بنیاد رہی ہے۔
انہوں نے بتایا کہ مالی خساروں کے باوجود ٹیم چھوڑنے کا فیصلہ کبھی نہیں کیا، تاہم اصولوں سے سمجھوتہ نہ کرنے کی وجہ سے اب رخصت ہو رہے ہیں۔ علی ترین نے کہا کہ ملتان سلطانز مالک سے زیادہ فینز اور جنوبی پنجاب کی ٹیم ہے، اس لئے شائقین نئے انتظام سنبھالنے والوں کا بھی بھرپور ساتھ دیں۔ انہوں نے کہا کہ وہ خود بھی آئندہ فینز کے درمیان بیٹھ کر ٹیم کی حمایت کرتے نظر آئیں گے۔
