اسلام آباد (نیوز ڈیسک) وزارت داخلہ نے کرکٹ میچوں کے دوران ٹریفک کی شدید مشکلات سے نمٹنے کے لیے وفاقی دارالحکومت میں نیا اسٹیڈیم تعمیر کرنے کا فیصلہ کر لیا ہے۔ذرائع کے مطابق سیکٹر D-12 کو اس مقصد کے لیے منتخب کیا گیا ہے جہاں بین الاقوامی معیار کا جدید کرکٹ اسٹیڈیم قائم کیا جائے گا۔ذرائع کا کہنا ہے کہ وزیرِ داخلہ نے چیئرمین سی ڈی اے کو ہدایت جاری کی ہے کہ منصوبہ زیادہ سے زیادہ ایک سال میں پایۂ تکمیل تک پہنچایا جائے۔ابتدائی معلومات کے مطابق نیا اسٹیڈیم دبئی کے ماڈل پر تیار کیا جائے گا۔

چونکہ اس کا مقام شہر کے مرکزی حصے سے دور ہوگا، اس لیے میچوں کے دوران ٹریفک جام جیسے مسائل میں واضح کمی کی توقع ہے۔مزید بتایا گیا ہے کہ اسٹیڈیم کے قریب سات ستارہ ہوٹل بھی بنایا جائے گا جہاں غیر ملکی کھلاڑیوں اور ٹیموں کے لیے رہائش، سیکیورٹی اور دیگر ضروری سہولیات فراہم ہوں گی۔ جدید پارکنگ ایریاز اور ٹرانسپورٹ سسٹم بھی منصوبے کا حصہ ہوں گے۔ذرائع کے مطابق اسلام آباد میں دبئی اسپورٹس کمپلیکس جیسی جدید سہولیات متعارف کروانے کا بھی ارادہ ہے، تاکہ شہر میں بین الاقوامی کھیلوں کے انعقاد کو زیادہ مؤثر اور آسان بنایا جا سکے۔