اسلام آباد (نیوز ڈیسک)  قومی کرکٹ ٹیم کے سابق کپتان شاہد آفریدی نے انکشاف کیا ہے کہ وہ ماضی میں ایک سیاسی جماعت میں شمولیت کے خواہشمند تھے۔
لندن میں میڈیا سے گفتگو کرتے ہوئے شاہد آفریدی نے بتایا کہ وہ 2019 سے 2020 کے دوران ایک سیاسی پارٹی کو جوائن کرنا چاہتے تھے، تاہم بعد میں انہوں نے اپنا فیصلہ بدل لیا۔
ان کا کہنا تھا کہ “میں نے سوچا کہ سیاست میرے دائرۂ عمل کی چیز نہیں، اس لیے بہتر یہی سمجھا کہ سیاست میں قدم نہ رکھوں۔”
آفریدی نے مزید کہا، “آپ سب دعا کریں کہ میں سیاست سے دور ہی رہوں، یہی میرا ارادہ ہے، البتہ آگے اللہ کا کیا منصوبہ ہے، یہ وہی بہتر جانتا ہے۔”
گفتگو کے دوران سابق کپتان نے وزیراعلیٰ پنجاب مریم نواز کی کارکردگی کی تعریف بھی کی۔ تاہم جب ان سے سابق وزیراعظم عمران خان سے متعلق سوال پوچھا گیا تو انہوں نے کوئی تبصرہ کیے بغیر “پاکستان زندہ باد” کا نعرہ لگا کر بات ختم کردی۔