اسلام آباد (نیوز ڈیسک )پاکستانی فاسٹ بولر شاہین شاہ آفریدی نے ٹی ٹوئنٹی انٹرنیشنل کرکٹ میں ایک اور بڑا اعزاز اپنے نام کر لیا۔ایشیا کپ ٹی ٹوئنٹی کے سپر 4 مرحلے میں کھیلے گئے اہم میچ میں پاکستان نے سنسنی خیز مقابلے کے بعد بنگلادیش کو 11 رنز سے شکست دے کر فائنل میں جگہ بنا لی۔136 رنز کے ہدف کے تعاقب میں بنگلادیشی ٹیم 20 اوورز میں 9 وکٹوں کے نقصان پر صرف 124 رنز ہی بنا سکی۔

پاکستان کی کامیابی میں شاہین شاہ آفریدی کا کردار نمایاں رہا، انہوں نے شاندار بولنگ کرتے ہوئے 17 رنز کے عوض 3 کھلاڑیوں کو پویلین کی راہ دکھائی اور میچ کے بہترین کھلاڑی قرار پائے۔ بیٹنگ میں بھی انہوں نے قیمتی 13 گیندوں پر 19 رنز بنائے جن میں 2 چھکے شامل تھے۔یہ شاہین آفریدی کے کیریئر کا 10واں پلیئر آف دی میچ ایوارڈ ہے، جس کے ساتھ ہی وہ ٹی ٹوئنٹی انٹرنیشنل میں سب سے زیادہ مرتبہ یہ اعزاز حاصل کرنے والے فاسٹ بولر بن گئے ہیں۔