اسلام آباد (نیوز ڈیسک)چیئرمین پاکستان کرکٹ بورڈ (پی سی بی) محسن نقوی کو چیمپئنز ٹرافی کے اختتام کے بعد ایک اہم اعزاز سے نوازا جائے گا۔ نجی ٹی وی چینل کی رپورٹ کے مطابق، محسن نقوی آئندہ ماہ دبئی میں ایشین کرکٹ کونسل (اے سی سی) کی صدارت سنبھالیں گے۔

اس وقت اے سی سی کی قیادت عبوری طور پر سری لنکن کرکٹ بورڈ کے صدر، شمی سلوا کے پاس ہے، تاہم جنرل کونسل کے اجلاس کے بعد یہ عہدہ محسن نقوی کو منتقل کر دیا جائے گا۔ اجلاس میں بھارت میں ہونے والے ایشیا کپ 2025 کے مقامات کا بھی حتمی فیصلہ کیا جائے گا، جہاں پاکستان کے میچز دبئی یا سری لنکا میں کروانے کی تجویز زیر غور ہے۔

گزشتہ روز یہ اطلاعات بھی سامنے آئی تھیں کہ گزشتہ برس پاکستان میں ہونے والے ایشیا کپ اور آئندہ چیمپئنز ٹرافی میں بھارت کی ممکنہ عدم شرکت کے پیش نظر ایونٹ کو ہائبرڈ ماڈل کے تحت کرانے کی تجویز دی گئی ہے۔ تاہم، ایشیا کپ کی میزبانی باضابطہ طور پر بھارت کے سپرد کیے جانے کا امکان ہے۔

ذرائع کے مطابق، اے سی سی نے یہ فیصلہ چیمپئنز ٹرافی سے قبل پاکستان اور بھارت کے درمیان ممکنہ تنازعات سے بچنے کے لیے کیا ہے تاکہ ٹورنامنٹ کے انعقاد میں کسی قسم کی رکاوٹ پیدا نہ ہو۔