دبئی (این این آئی)انٹرنیشنل کرکٹ کونسل (اّئی سی سی) ویمنز ٹی 20 ورلڈ کپ کے گروپ میچ میں اّسٹریلیا نے بھارت کو 9 رنز سے شکست دے دی جس کے بعد بھارت اور پاکستان کی خواتین کرکٹ ٹیموں کی قسمت جڑ گئی ہے ،اگر پاکستان جیتا تو وہ سیمی فائنل میں اور بھارت باہر ہو جائے گا اور ہار کی صورت میں انڈیا سیمی فائنل اور پاکستان آئوٹ ہو جائیگا۔گروپ اے کے اہم ترین میچ میں فتح کے ساتھ آسٹریلوی ویمنز ٹیم نے گروپ میں ٹاپ پوزیشن اپنے نام کرلی۔
اّسٹریلیا نے پہلے بیٹنگ کرتے ہوئے 8 وکٹ پر 151 رنز بنائے اور بھارتی ٹیم کیلئے 152 رنز کا ہدف سیٹ کیا۔گریس ہیرس 40، ایلس پیری 32 اور کپتان تاہیلا نے 32 رنز بنائے اور ٹیم کی پوزیشن بہتر کی۔ کوئی اور کھلاڑی خاطر خواہ پرفارمنس نہ دکھا سکی۔بھارتی ویمنز ٹیم 152 رنز کے ہدف کے تعاقب میں مقررہ اوورز میں 9 وکٹ پر 142 رنز تک محدود رہی اور یوں اسے 9 رنز سے شکست کا سامنا کرنا پڑا۔بھارت کی ہرمن پریت کور 54 رنز کے ساتھ ناقابل شکست رہیں جبکہ دیپتی شرما 29، شفالی ورما 20 اور جمائمہ روڈریگاز 16رنز بناسکیں۔اّسٹریلیا کی انابیل اور سوفی مولی نکس نے 2، 2 وکٹ اپنے نام کیے۔ اس فتح کے ساتھ ٹیم نے اگلے مرحلے کیلیے کوالیفائی کرلیا ہے۔کل 14 اکتوبر کو نیوزی لینڈ اور پاکستان کے درمیان اہم ترین میچ ہے، نیوزی کی فتح کی صورت میں بھارت ایونٹ سے باہر ہوسکتا ہے۔
