لاہور (این این آئی)سابق ٹیسٹ کرکٹر عبد الرحمن کو گھر کے باہر ڈاکوؤں نے لوٹ لیا۔ذرائع کے مطابق سابق آف اسپنر عبد الرحمن کو ان کے گھر کے باہر دو ڈاکوؤں نے گن پوائنٹ پر لوٹ لیا۔ان کے ہمراہ ان کی بیگم اور 8 ماہ کی بیٹی تھی۔سابق ٹیسٹ کرکٹر نے بتایا ہے کہ واقعہ آج شام گھر جوہر ٹاؤن کے باہر پیش آیا، ڈاکو موٹر سائیکل پر سوار تھے، انہوں نے گن میری بیٹی پر تان لی تھی، پرس اور جیولری لوٹ کر ڈاکو فرار ہو گئے۔

عبد الرحمن نے بتایا کہ واقعہ کی رپورٹ چوکی جوہر ٹاؤن میں کروا دی ہے۔واضح رہے کہ عبدالرحمٰن نے 22 ٹیسٹ، 31 ون ڈے اور 8 ٹی ٹوئنٹی میچز میں پاکستان کی نمائندگی کی۔انہوں نے ٹیسٹ میں 99، ون ڈے میں 30 اور ٹی ٹوئنٹی میں 11 وکٹیں حاصل کیں ہیں۔