کراچی(این این آئی)سابق کپتان اور کمنٹیٹر رمیز راجہ نے کہا ہے کہ ایک عرصے سے ٹیم غیر ملکی ٹورز میں ٹاپ آرڈر کے مسائل کا شکار نظر آتی ہے، بیٹسمین کنڈیشنز سے مطابقت نہیں پیدا کر پاتے۔ ایک انٹرویومیں انھوں نے کہاکہ پہلے ٹیسٹ میں شکست کے بعد

دوسرے میچ میں پاکستان کو بہتر آغاز کے ساتھ حریف پر دبائو بڑھانے کی ضرورت تھی مگر صرف 2رنز پر 3وکٹیں گنوا دیں،ایک عرصے سے ٹیم غیر ملکی ٹورز میں ٹاپ آرڈر کے مسائل کا شکار نظر آتی ہے، بیٹسمین کنڈیشنز سے مطابقت نہیں پیدا کر پاتے۔انھوں نے کہا کہ یہ بات درست ہے کہ جمیکا کی پچز پر بیٹنگ آسان نہیں ہوتی مگر جب تک ان کے مطابق تکنیک اختیار نہ کریں کامیابی نہیں مل سکتی، ٹاپ تھری نے تکنیکی طور پر انتہائی خراب پرفارم کیا جس سے ان کا اعتماد مزید متزلزل ہوگیا،اگر اسی ڈگر پر رہے تو بقا مشکل ہوگی۔رمیز راجہ نے کہا کہ اظہر علی نے اتنی زیادہ کرکٹ کھیل لی مگر وہ ابھی تک کریز پر توازن برقرار رکھنا نہیں سیکھ پائے، عمر کے ساتھ ان کی گیند کو سمجھنے کی استعداد بھی کم پڑتی جارہی ہے،ان کو اگلی اننگز میں پاکستان ٹیم کی ضرورت کے مطابق کچھ خاص کردکھانا ہوگا، یہی ذمہ داری اوپنرز کی ہوگی۔