اسلا م آباد (این این آئی)قومی ٹیم کے سابق کپتان رمیز راجہ نے ٹی 10 لیگ کھیلنے پر بضد آل رائونڈر محمد حفیظ کو ’خود غرض‘ قرار دیتے ہوئے کہا ہے کہ آپ کے فیصلے آپ کی ترجیحات کی عکاسی کرتے ہیں،اس وقت سب کو پاکستان کرکٹ کے ساتھ ہونا چاہئے، نٹرنیشنل ٹیمیں اب پاکستان آنا شروع ہوگئی ہیں اس لیے ضروری ہے کہ ہر
کوئی کوویڈ پروٹوکول پر سختی سے عمل درآمد کرے۔ایک انٹرویومیں انہوںنے کہاکہ ٹی10 لیگ کھیلنے جانے والے قومی کھلاڑیوں میں سے آصف علی واپس آگئے مگر حفیظ نے اپنا کنٹریکٹ مکمل کرنے کا فیصلہ کیا جو ان کی سوچ اور ترجیحات کی عکاسی کرتا ہے، ہمیں لازمی طور پر کورونا پروٹوکول کی پیروی کرنا چاہیے۔انہوں نے اپنی بات جاری رکھتے ہوئے کہا کہ حارث رئوف کی مثال آپ کے سامنے ہے ، انہوں نے جنوبی افریقا کے خلاف ٹیسٹ اسکواڈ کا حصہ بننے کیلئے بگ بیش لیگ چھوڑ دی، اس سے ان کی ترجیحات کے بارے میں پتہ لگ رہا ہے۔انہوں نے کہا کہ اگر آپ پاکستان کو ترجیح دے رہے ہیں تو آپ درست سمت میں گامزن ہیں لیکن اگر آپ پاکستانی ٹیم میں انتخاب کی قیمت پر لیگ کرکٹ کو ترجیح دیتے ہیں تو آپ ٹھیک راستے پر نہیں جارہے ہیں۔رمیز راجہ نے کہا کہ ہر کھلاڑی کو خودغرضی دکھانے کی بجائے پاکستان کے بارے میں سوچنا چاہیے ورنہ کوئی آپ کی حمایت میں سامنے نہیں آئے گا۔ دوسری جانب پاکستان سپرلیگ کے چھٹے سیزن میں تماشائیوں کو میچ دیکھنے کی اجازت دینے کا فیصلہ کیا گیا ہے۔ذرائع نے بتایا کہ ابتدائی طور پر 25فیصد اسٹیڈیم بھرا جائے گا۔ حکومت کی جانب سے اجازت ملنے اور حتمی فیصلے کے بعد پی ایس ایل سیزن 2021 میں شائقین کرکٹ کو اپنے پسندیدہ کرکٹرز سٹیڈیم
میں بیٹھ کر ان ایکشن دیکھنے کا موقع ملے گا۔پی ایس ایل6 فروری اور مارچ میں کھیلا جائے گا جس کی ڈرافٹنگ مکمل ہوگئی ہے۔پاکستان سپر لیگ میں قومی کھلاڑیوں کے ساتھ 37 غیرملکی کھلاڑی مختلف ٹیموں کا حصہ بن گئے ہیں،پلاٹینیم کیٹگری کی پہلی پک میں اسلام آباد یونائیٹڈ نے وائلڈ کارڈ پر فاسٹ بائولر حسن علی کا انتخاب کیا ہے۔کوئٹہ گلیڈیٹرز نے مایہ ناز ویسٹ انڈین بلے باز کرس گیل اور ٹام بینٹن، لاہور قلندرز نے افغانستان کے کپتان
راشد خان، پشاور زلمی نے ڈیوڈ ملر، اور ملتان سلطانز نے کرس لین کو پلاٹینیم کیٹگری میں چن لیا۔ڈائمنڈ کیٹگری میں اسلام آباد نے لوئس ریگری، پشاور زلمی نے مجیب الرحمان اور شیرفین ردرفوڈ، اور کراچی کنگز نے محمد نبی اور ڈین کرسٹن کو ٹیم میں شامل کیا ہے اس کے علاوہ گولڈ کیٹگری میں اسلام آباد نے فل سالٹ، لاہور نے سمتھ پٹیل، زلمی عماد بٹ کوئٹہ نے عثمان شنواری اور کراچی نے چیڈوک والٹن کا انتخاب کیا۔
