میڈرڈ(آن لائن) اسپورٹس کی تاریخ کا سب سے مہنگا کنٹریکٹ لیک ہو گیا۔غیر ملکی خبر رساں ادارے کی رپورٹ کے مطابق اسپین کا اخبار بارسلونا کے اسٹار کھلاڑی لیونل میسی کے کنٹریکٹ کی لیک کاپی سامنے لے آیا ہے۔رپورٹ کے مطابق بارسلونا کے لیے میسی 4 سیزن کے 55 کروڑ یورو وصول کر رہے ہیں جس کی پاکستانی
روپوں میں قیمت 110 ارب روپے ہے۔2017 سے شروع ہونے والا یہ معاہدہ رواں سال 30 جون کو ختم ہو رہا ہے، اگر معاہدے میں مزید توسیع نہ کی گئی تو میسی بارسیلونا کلب کو خیرباد کہہ دیں گے۔ رپورٹ کے مطابق میسی کے کنٹریکٹ کی قیمت اور عالمی وبا کورونا وائرس کی وجہ سے بارسلونا کو اربوں کا نقصان ہوا ہے۔میسی کی سالانہ تنخواہ 8 کروڑ یورو یعنی 16 ارب روپے سالانہ ہے جب کہ انہیں چار سال پہلے کنڑیکٹ سائن کرنے پر اضافی بونس بھی ملا تھا۔ خیال رہے کہ میسی کے کنٹریکٹ ختم ہونے میں 5 ماہ باقی ہیں اور وہ اب تک 45 کروڑ یورو گھر لے جا چکے ہیں۔دوسری جانب بھارتی کرکٹ ٹیم کے کپتان ویرات کوہلی کی جانب سے بیٹی کو تحفہ ملنے پر آسٹریلین اوپنر ڈیوڈ وارنر نے خوشی کا اظہار کیا ہے اپنی خوشی کا اظہار ڈیوڈ وارنر نے فوٹوز اینڈ ویڈیو شیئرنگ ایپ انسٹاگرام پر ایک پوسٹ کے ذریعے کیا۔ ڈیوڈ وارنر نے انسٹاگرام پر اپنی بیٹی اِنڈی کی تصویر شیئر کی جس میں وہ ویرات کوہلی کے دستخط والی شرٹ پہنی ہوئی ہیں۔ کیمرے کی جانب دیکھتے ہوئے وارنر کی بیٹی ویرات کوہلی کی شرٹ پہنے خوشی کا اظہار کر رہی ہیں۔ اپنے پیغام میں انھوں نے لکھا کہ حالانکہ ہماری ٹیم سیریز ہار گئی ہے تاہم میری بیٹی بھارتی کپتان کی جانب سے ملنے والے اس خصوصی تحفے کے باعث بہت خوش ہے۔
