کراچی، لاہور(این این آئی)جنوبی افریقی ٹیم نے خون کے سرطان میں مبتلا 16 سالہ عمار کی خواہش پوری کردی۔خون کے سرطان میں مبتلا 16 سالہ عمار رفیع کی جنوبی افریقی کرکٹ ٹیم کے کھلاڑیوں کی ٹی شرٹ حاصل کرنے کی خواہش پوری ہوگئی۔نیشنل اسٹیڈیم کراچی میں ڈین ایلگر نے عمار رفیع کو جنوبی افریقی ٹیم کے کھلاڑیوں کی دستخط شدہ ٹی شرٹ دی۔شرٹ حاصل کرنے کے بعد

بچے کی خوشی کا کوئی ٹھکانہ نہ تھا۔دوسری جانب پاکستان اور جنوبی افریقا کے درمیان تین ٹی ٹوئنٹی میچز کی سیریز کیلئے پاکستان ٹیم کا اعلان آج کیا جائے گا، سیریز کا آغاز 11 فروری سے ہوگا، لاہور میں ہونے والے میچز کے لیے قذافی اسٹیڈیم کی تزئین و آرائش آخری مرحلے میں داخل ہوگئی ہے۔تفصیلات کے مطابسق ٹیسٹ سیریز کے بعد پاکستان ٹیم کا اگلا اسائنمنٹ جنوبی افریقاکے خلاف ٹی ٹوئنٹی سیریز ہے جس کے لئے ٹیم کا اعلان اتوار کو کیا جائیگا،لاہور میں 11فروری سے شروع ہونے والی ٹی ٹوئنٹی سیریز کے لئے تیاریاں آخری مرحلے میں داخل ہوگئی ہیں،سیریز کیلئے گرائونڈ تیار ہوگیا ہے، دھوپ نکلنے کی وجہ سے گرائونڈ اسٹاف کو ٹی ٹوئنٹی کے تقاضوں کے مطابق وکٹوں کی تیاری کا اچھا موقع مل گیا ہے۔لاہور کے تاریخی قذافی اسٹیڈیم کا سرسبز گرائونڈ خوبصورت منظر پیش کررہا ہے اور یہاں تیاریاں بھی آخری مرحلے میں داخل ہوگئی ہیں۔پاکستان اور جنوبی افریقاکے درمیان ٹی ٹوئنٹی سیریز کے میچز کا آغاز شام 6 بجے ہوگا، میچ کا ٹاس ساڑھے 5 بجے ہوگا جبکہ کووڈ کی وجہ سے ٹی ٹوئنٹی سیریز میں بھی کرائوڈ کو آنے کی اجازت نہیں ہوگی۔واضح رہے کہ ٹی ٹوئنٹی سیریز کے میچز11، 13 اور 14 فروری کو قذافی اسٹیڈیم میں ہوں گے۔