ؒلاہور(این این آئی) سابق کرکٹر جاوید میانداد نے وزیر اعظم عمران خان سے ملاقات کا وقت دینے کی درخواست کرتے ہوئے کہا ہے کہ میرے پاس ایسا آئیڈیا ہے جس سے ملک کا سارا قرض اتر جائے گا،ہماری تو قسمت میں ہی یہ رہ گیا ہے کہ مانگتے جاؤ، ملک کو لوٹنے والے نکل گئے اور عوام بیچارے معاشی طور پر مر گئے ہیں۔

کورونا وائرس سے متاثرین کیلئے احساس ٹیلی تھون میں وزیر اعظم عمران خان سے بذریعہ ٹیلیفونک گفتگو کرتے ہوئے جاوید میانداد نے کہا کہ ملک کو اچھا سر براہ مل گیا ہے اور انشا اللہ مشکلات ختم ہوں گی، یہ آزمائش کا وقت ہے۔ انہوں نے کہا کہ وزیر اعظم عمران خان سے درخواست ہے کہ میرے ساتھ ایک میٹنگ کر لیں، سب کو پتہ ہے کہ میں کیلکولیٹر ہوں، میرے پاس ایسا آئیڈیا ہے جس سے ملک کا سارا قرضہ اتر جائے گا۔ا نہوں نے کہا کہ کورونا وائرس رک نہیں سکتا لیکن غریب بیچارے معاشی حالات سے مر گئے ہیں۔ انہوں نے کہا کہ ملک کو لوٹنے والے نکل گئے ہیں اور ملک کو اس حال میں چھوڑ گئے ہیں۔ٹیلی تھون میں سابق کرکٹر وقار یونس نے بھی بذریعہ ٹیلیفون شرکت کی۔