اسلام آباد (این این آئی)دنیا بھر کی طرح پاکستان میں بھی کورونا وائرس کے باعث کھیلوں کی سرگرمیاں متاثر ہوئی ہیں۔کورونا وائرس کی وجہ سے پاکستان سمیت دنیا بھر میں کھیلوں کی سرگرمیاں متاثر ہونے کا سلسلہ جاری ہے ، پاکستان سپر لیگ ( پی ایس ایل) کے سیمی فائنل اور فائنل ملتوی ہونے کے بعد ایشین کنفیڈریشن آف بلیئرڈز اسپورٹس نے اس ماہ کے آخر میں ہونے والے ایونٹس کا سلسلہ معطل کردیا ۔
ذرائع کے مطابق ایشین ٹیم اسنوکر چمپئن شپ، ایشین مینز اسنوکر چمپئن شپ اور ایشین سکس ریڈ چمئن شپ کو ملتوی کردیا گیا ہے، یہ تینوں ایونٹ 27 مارچ سے دوحا میں کھیلے جانے تھے۔ایونٹ میں پاکستان سمیت 20 ملکوں کے کیوئسٹس نے شرکت کرنا تھی ، پاکستان ایشین ٹیم چمپئن شپ کا دفاعی چمپئن بھی ہے۔پاکستانی نژاد برطانوی باکسر عامر خان نے بھی اعلان کیا کہ 21 مارچ کو اسلام آباد میں ہونے والا پروفیشنل باکسنگ ایونٹ بھی کورونا وائرس کی وجہ سے ملتوی کردیا گیا ہے۔ایونٹ میں پاکستانی باکسر عثمان وزیر سمیت پاکستانی اور غیر ملکی پروفیشنل باکسرز کی شرکت متوقع تھی۔ پاکستان باکسنگ فیڈریشن نے بھی حالات بہتر ہونے تک تمام سرگرمیاں معطل کردی ہیں۔ پاکستان فٹبال فیڈریشن نے بھی مزید احکامات تک اپنی تمام سرگرمیاں معطل کردی ہیں اور ملک میں جاری بی ڈویڑن فٹبال لیگ کو بھی روک دیا گیا ،فیڈریشن کی جانب سے لیگ کے بقیہ میچز کا شیڈول بعد میں جاری کیا جائے گا۔دوسری جانب 24 جولائی سے جاپان میں ہونے والے ٹوکیو اولمپکس 2020 کا انعقاد بھی مشکل نظر آنے لگا امریکی صدر ڈونلڈ ٹرمپ نے کورونا وائرس کے باعث جاپان میں ہونے والے اولمپکس گیمز 2020کو ملتوی کرنے کی تجویز دیدی ہے۔ڈونلڈ ٹرمپ کے مطابق تماشائیوں کے بغیر خالی اسٹیڈیمز دیکھنے سیزیادہ اولمپکس گیمز ملتوی ہونا بہتر ہے۔کورونا کے خدشات کے پیش نظر انڈین پریمیئر لیگ 2020 بھی ملتوی کردی گئی ہے۔کرکٹ کی معروف ویب سائٹ کرک انفو کے مطابق آئی پی ایل کا آغاز 29 مارچ سے ہونا تھا تاہم کورونا کے باعث ٹورنامنٹ کو 15 اپریل تک ملتوی کردیا گیا اور صورتحال بہتر ہونے کی صورت میں ایونٹ کا آغاز 16 اپریل سے ہو گا۔اس کے علاوہ یورپی فٹبال لیگ یوئیفا چیمپیئنز لیگ اور امریکا کی نیشنل باسکٹ بال ایسوسی ایشن (این بی اے) لیگ نے بھی کورونا وائرس کے باعث تاحکم ثانی مقابلے منسوخ کردیے ہیں۔
