برسبین(آن لائن)پاکستان اور آسٹریلیا کے درمیان پہلے ٹیسٹ کے دوران قومی ٹیم کے نوجوان کھلاڑیوں کی جانب سے اپنے بھارتی ڈرائیور کو کھا نا کھلائے جانے کا انکشاف ہوا ہے۔ گزشتہ روز سماجی رابطے کی ویب سائٹ ٹوئٹر کے ایک پیج ’اے بی سی گرینڈ سٹینڈ‘ پر ایک ویڈیو شیئر کی گئی جس میں اے بی سی ریڈیو کی خاتون کمنٹیٹر الیسن مشیل نے
اپنے ساتھی کمنٹیٹر اور سابق کینگرو فاسٹ بالر مچل جونسن کو بھارتی ڈرائیور اور پاکستانی کھلاڑیوں کی ایک دلچسپ کہانی سنائی۔ الیسن مشیل کا کہنا تھا کہ 5 پاکستانی کھلاڑی جن میں نسیم شاہ، یاسر شاہ، شاہین شاہ آفریدی سمیت دیگر 2 کھلاڑی بھی شامل تھے، نے ٹیم ہوٹل کے باہر سے ایک بھارتی ریسٹورنٹ جانے کے لیے ٹیکسی بک کروائی جس کا ڈرائیور بھارتی تھا،جب پاکستانی کھلاڑی ہوٹل سے ریسٹورنٹ پہنچے تو ٹیکسی ڈرائیور نے ان کھلاڑیوں سے کرایہ لینے سے انکار کر دیا اور کہا کہ یہ رائیڈ میری طرف سے آپ کے لیے تحفہ تھی جس کے بعد پاکستانی کھلاڑیوں نے اس ڈرائیور کو اپنے ساتھ ہوٹل کے اندر چلنے اور رات کا کھانا ساتھ کھانے کی دعوت دی جسے ڈرائیور نے قبول کر لیا۔خاتون کمنٹیٹر کا مزید کہنا تھا کہ انہوں نے ہوٹل سے گراؤنڈ آنے کے لیے جس ٹیکسی کا استعمال کیا تھا یہ وہی بھارتی ٹیکسی ڈرائیور تھا جس سے پاکستانی ٹیم کے 5 کھلاڑیوں کی ملاقات ہوئی تھی، اس نے سفر کے دوران مجھے پاکستانی کھلاڑیوں کی یہ کہانی سنائی اور ان کے ساتھ لی گئی تصاویر بھی دکھائیں۔واضح رہے کہ گزشتہ روز پاکستان اور آسٹریلیا کے درمیان ہونے والی برسبین ٹیسٹ اننگ میں آسٹریلیا نے پاکستان کو 5 رنز سے ہرا دیا تھا۔پاکستان نے آسٹریلیا کیخلاف پہلی اننگز میں 240 اور دوسری اننگز میں 335 رنز بنائے، دوسری اننگ میں بابر اعظم کی سنچری بھی پاکستان کو اننگ کی شکست سے نہ بچا سکی۔
