اسلام آباد (آن لائن) قومی ہیرو اور ورلڈ چیمپئن ریسلر انعام بٹ کو وفاقی حکومت کی جانب سے تاحال پذیرائی نہ مل سکی۔ تفصیلات کے مطابق ورلڈ بیچ گیمز میں گولڈ میڈل حاصل کرنے والے انعام بٹ کی پاکستان کیلئے خدمات کے اعتراف میں پاکستان اولمپک ایسو سی ایشن کے صدر لیفٹیننٹ جنرل ر سید عارف حسن نے قومی ہیرو کو کھیلوں کا سفیر مقرر کرنے سمیت ان کی حوصلہ افزائی کیلئے پانچ لاکھ روپے کی انعامی رقم بھی دی لیکن وفاقی حکومت کی جانب سے سرکاری سطح پر قومی ریسلر کی
حوصلہ افزائی کیلئے کوئی تقریب منعقد نہیں کی جا سکی جبکہ وفاقی وزیر ڈاکٹر فہمیدہ مرزا بھی انعام بٹ کو مدعو کرکے قومی ہیرو کی حوصلہ افزائی کرنے میں ناکام رہی، کھیلوں سے تعلق رکھنے والے حلقوں نے وزیر اعظم عمران خان، صدر عارف علوی اور آرمی چیف جنرل قمر جاوید باجوہ سے درخواست کی ہے کہ دنیا میں پاکستان کا پرچم بلند کرنیوالے قومی ہیرو انعام بٹ کو مدعو کرکے ان کی حوصلہ افزائی کی جائے تاکہ دیگر کھلاڑی بھی انعام بٹ کی طرح پاکستان کا نام روشن کر سکیں۔
