1لاہور(آئی این پی)یونس خان نے 2014 میں ٹیسٹ کرکٹ میں اچھی فارم کے باوجود ون ڈے ٹیم میں شامل نہ ہونے پر سلیکٹرز کو شدید تنقید کا نشانہ بناتے ہوئے ’تاریخی‘ جملہ بولا تھا کہ ’’ کیا میں خود کو گولی مارلوں‘‘۔ کامران اکمل بھی ان کے انداز میں ہی توجہ حاصل کرنے کو ہی آخری راستہ سمجھتے ہوئے کہا ہے کہ ’’اب صرف ایک ہی راستہ بچا ہے کہ میں یونس بھائی کی طرح بات کروں کیونکہ میں واپسی کے لئے سب کچھ کرکے دیکھ چکا ہوں، دیکھتے ہیں کہ آگے کیا ہوتا ہے
کیونکہ ابھی تو ویسٹ انڈیز کے ٹور کے لئے ٹیم کا اعلان نہیں ہوا ہے۔ پی ایس ایل 2کے آخری پلے آف میچ میں کراچی کنگزکے خلاف شاندار سنچری اسکورکرنے والے کامران اکمل کااپنے ایک انٹرویومیں مزید کہناتھا کہ’’ یہ کتنے افسوس کی بات ہے کہ میں گزشتہ تین برس سے قومی ٹیم میں واپسی کیلئے جدوجہد کررہا ہوں، میں نے سخت محنت کی ہے، رنز اسکور کئے ہیں، میری فٹنس کے ساتھ کوئی مسئلہ نہیں ہے، اب باقی کام سلیکٹرز اور ٹیم مینجمنٹ ہے اور وہی میری ٹیم میں واپسی پر بہتر انداز میں بات کرسکتے ہیں‘‘۔
