کراچی (آن لائن )پاکستان سپر لیگ کے فائنل کیلئے کراچی سے دبئی تک بکیز بھی سر گرم ہو گئے ہیں، بکیز کی جانب سے پشاور زلمی کو فیورٹ قرار دیا گیا ہے۔پی ایس ایل کے فائنل کیلئے کراچی سے دبئی تک بکیز سرگرم ہو گئے ہیں، بکیز کی جانب سے پشاور زلمی 80 پیسے کے ریٹ سے آگے ہے جبکہ کوئٹہ گلیڈیٹر کا ریٹ ایک روپے 18 پیسے ہے۔ذرائع کے مطابق کراچی میں بکیز نے فائنل کے لیے سٹے بازی کیلئے عارضی
اڈے قائم کر لیے ہیں، جن میں گارڈن، ناظم آباد، سولجر بازار، ڈیفنس، گلشن اقبال، طارق روڈ، بہادر آباد شامل ہے۔ذرائع کا مزید کہناتھاکہ دبئی میں دلیپ کمار، نعمان چیچا، روی ، عرفان موٹن، سکندر آرکے، فیروز پاسپورٹ، ناصر وکی، آصف قلندری، فرحان دبئی، اور فاروق مٹکا کی جانب سے ریٹ کھولے گئے ہیں۔دوسری جانب ایس پی شاہ فیصل علی آصف، ایس پی گلبرگ بشیر بروہی اور ایس پی گلشن ڈاکٹر فہد نے میڈیا سے گفتگو میں بتایا کہ پولیس کی جانب سے چھاپے جاری ہیں ، کہیں بھی جوے کی اطلاع پر کارروائی کی جائے گی۔
