لاہور( این این آئی)پاکستان سپر لیگ کے چیئرمین نجم سیٹھی کی طرف سے طالبات اور معذور افراد میں 1500مفت ٹکٹس کی تقسیم کے اعلان کے بعد ایک بڑی تعداد مال روڈ پر واقع ہوٹل کے باہر پہنچ گئیں جنہیں پولیس نے اندر جانے سے روکدیا۔گزشتہ روز نجم سیٹھی کی طرف سے سوشل میڈیا پر پی ایس ایل فائنل کیلئے طالبات کو اصل قومی اور تعلیمی ادارے کے کارڈ پر پہلے آئیں پہلے پائیں کی بنیاد پر 1000ٹکٹس مفت دینے

کا اعلان کیا گیا ۔ اسی طرح معذور افراد کیلئے بھی اصل قومی شناختی کارڈ دکھا کر پہلے آئیں پہلے پائیں کی بنیاد پر8000 مالیت والے 500 مفت ٹکٹس دینے کی نوید سنائی گئی ۔ سوشل میڈیا پر ٹوئٹ اور میڈیا میں خبر آتے ہی طالبات اور معذور افراد کی ایک بہت بڑی تعداد ٹکٹیں لینے پہنچ گئے تاہم انہیں اعلان کردہ مال روڈ پر واقع ہوٹل میں متعلقہ حال تک جانے سے روکدیا گیا ۔پولیس ٹکٹ کیلئے آنے والوں کو کشمیر روڈ پر کائونٹر قائم ہونے کا کہہ کر وہاں سے ہٹانے میں مصروف رہی ۔پولیس کا کہنا تھاکہ سکیورٹی کے لئے ایس او پیز طے کئے گئے تھے لیکن ایک بڑی تعداد کے جمع ہونے پر انہیں سکیورٹی انتظامات میں شدید مشکلات کا سامنا کرنا پڑا۔