دبئی(مانیٹرنگ ڈیسک) بوم بوم آفریدی گزشتہ 2 سالوں سے کرکٹ میں میدانوں میں تو شائقین کے دل نہ جیت سکے لیکن آف دی فیلڈ انہوں نے ایسا کارنامہ انجام دیا جس نے پاکستانیوں کا سر فخر سے بلند کردیا ہے۔ شاہد آفریدی کرکٹ کے ساتھ ساتھ عوام کے لیے فلاحی کاموں میں بھی دلچسپی رکھتے ہیں اور ایسا ہی کچھ انہوں نے دبئی کی جیلوں میں قید پاکستانیوں کے لیے کیا، قومی ٹیم کے سابق کپتان نے
’’شاہد آفریدی فاؤنڈیشن‘‘ کے ذریعے 25پاکستانیوں کی رہائی میں مدد کی جو دبئی میں مختلف کیسز میں زیر حراست تھے۔شاہد آفریدی نے 25 پاکستانیوں کو ان کے معمولی جرائم کے جرمانے ادا کرکے رہاکروایا۔ دبئی پولیس کے جنرل ڈائریکٹورٹ آف ہیومن رائٹس کے ڈی جی بریگیڈیئر ڈاکٹر محمد المر کے مطابق بائونس چیکس اور قرضوں کی عدم ادائیگی کی وجہ سے یہ پاکستانی سزا کاٹ رہے تھے۔شاہد آفریدی نے ان 25 پاکستانیوں کی رہائی کیلئے 80 ہزار درہم تقریباََ 22لاکھ روپے پاکستانی کی رقم ادا کرنی ہے۔ اس حوالے سےشاہد آفریدی نے اپنے فیس بک اکاؤنٹ پر دبئی پولیس کا شکریہ ادا کرتے ہوئے کہا کہ ان کے اس قابل تعریف عمل سے یہ پاکستانی ملک واپس جاکر ایک نئی زندگی کی شروعات کرسکیں گے جب کہ دبئی پولیس کے تعاون کے بغیر یہ کبھی ممکن نہ ہوتا۔ انہوں نے کہا کہ ’’شاہد آفریدی فاؤنڈیشن‘‘ کے پلیٹ فارم سے اس کام کو انجام دینے پر بہت خوش ہوں۔
