اینٹورپ(نیوزڈیسک)ہاکی ورلڈ لیگ اولمپک کوالیفائنگ راؤنڈ میں آئیر لینڈ نے پاکستان کو ایک گول سے شکست دے کر ریو اولمپکس کے ٹکٹ سے محروم کردیا۔ پاکستان پہلی بار اولمپکس کی دوڑ سے باہر ہوا ہے۔ کئی برسوں سے وینٹی لیٹر پر چلنے والا پاکستان کا قومی کھیل اینٹورپ میں دم توڑ گیا۔ گزشتہ سال ورلڈ کپ سے باہر ہونے کا صدمہ جھیلا تھا اب اولمپکس کھیلنے سے محروم ہوگئے۔ بیلجیئم کے شہر اینٹورپ میں پاکستان ہاکی ٹیم آئرلینڈ کی کمزور ٹیم سے بھی ناکامی کا داغ لگا بیٹھی اور ایک گول سے شکست کے بعد 2016ءمیں ہونے والے ریو اولمپکس سے باہرہوگئی۔ آئرلینڈ نے فیصلہ کن گول آخری کوارٹر میں پنالٹی کارنر پر کیا، اس کے بعد پاکستان کی گول برابر کرنے کی تمام کوششیں ضائع ہوگئیں ۔پاکستان ٹیم اب ٹورنامنٹ میں ساتویں اورآٹھویں پوزیشن کا میچ کھیلے گی۔