لندن (نیوزڈیسک )انگلینڈ کی جانب سے سب سے زیادہ وکٹیں لینے والے کرکٹر بننے پر جیمز اینڈرسن کیلئے ملکہ برطانیہ نے آفیسر آف دی موسٹ ایکسی لینٹ آرڈر آف دی برٹش امپائر کا اعلان کیا ہے۔ فاسٹ بولر، ملکہ الزبتھ کی سالگرہ کے موقع پر اعزاز پانے والے افراد کی فہرست میں شامل ہیں۔ اس بارے میں جیمز اینڈرسن نے اپنے تاثرات کا اظہار کرتے ہوئے قوم اور اپنی ٹیم لنکا شائر کا بطور خاص شکریہ ادا کیا ہے۔ جیمز اینڈرسن حال ہی میں آئن بوتھم کا383وکٹوں کا ریکارڈ توڑتے ہوئے اپنے ملک کی جانب سے سب سے زیادہ وکٹیں لینے والے بلے باز بنے ہیں۔ یہ اعزاز انہوں نے ویسٹ انڈیز کیخلاف سیریز کے دوران حاصل کیا ہے۔ اینڈرسن انگلینڈ کی جانب سے400 ٹیسٹ وکٹیں لینے والے پہلے بولر ہیں۔