پونے (نیوز ڈیسک) رائل چیلنجرز بنگلور کے کپتان اور مایہ ناز بلے باز ویرات کوہلی نے کہا ہے کہ چنائی سپر کنگز کو شکست دیکر فائنل کےلئے کوالیفائی کرینگے۔ انہوں نے کہا کہ چنائی سپر کنگز کی ٹیم میں تجربہ کار کھلاڑی موجود ہیں اور انکے خلاف میچ آسان نہیں ہوگا، تمام کھلاڑیوں کو ایونٹ کا فائنل کوالیفائی کرنے کے لیے سر توڑ کوشش کرنا ہوگی۔ آئی پی ایل کے کولیفائر ٹو میں پہنچنے والی ٹیمیں چنائی سپر کنگز اور رائل چیلنجرز بنگلور (آج) جمعہ کو رونچی کے مقام پر پنجہ آزما ہونگی۔
آئی پی ایل ایٹ کے ایلی مینیٹر میچ میں رائل چیلنجرز بنگلور کی ٹیم نے راجستھان رائلز کو 71 رنز سے شکست دیکر کوالیفائر ٹو کے لیے کوالیفائی کیا تھا۔ رائل چیلنجرز بنگلور کے کپتان ویرات کوہلی کا کہنا ہے کہ راجستھان رائلز کے خلاف کامیابی کے بعد انکی ٹیم کا مورال بلند ہوا ہے اور آئندہ میچ میں انکی ٹیم چنائی سپر کنگز کو شکست دیکر فائنل کے لیے کوالیفائی کریگی۔ انہوں نے اپنی ٹیم کو خبردار کرتے ہوئے کہا ہے کہ آئندہ میچ ہمارے لئے بڑی اہمیت کا حامل ہے، چنائی سپر کنگز کی ٹیم آسان حریف نہیں اور اسے شکست دینے کےلئے کھیل کے ہر شعبے میں بہترین کھیل پیش کرنا ہوگا۔ انہوں نے کہا کہ ہم یہ میچ فائنل سمجھ کر کھیلیں گے۔ انہوں نے کہا کہ انکی ٹیم کے تمام کھلاڑی مکمل طور پر فٹ اور بھر پور فارم میں ہیں اور چنائی سپر کنگز کے خلاف میچ کھیلنے کے لیے بے تاب ہیں۔