ونڈہوک(نیوز ڈیسک) آئی سی سی انٹر کانٹی نینٹل کپ میں نمیبیا نے ہانگ کانگ کو 114 رنز کے بھاری مارجن سے ہرا دیا۔ ہانگ کانگ کی ٹیم چار روزہ میچ کے آخری روز 301 رنز کے ہدف کے تعاقب میں اپنی دوسری اننگز میں 187 رنز بنا کر آﺅٹ ہو گئی۔ سخاوت علی 43 اور حسیب امجد 41 رنز بنا کر نمایاں رہے۔ ونڈہوک میں کھیلے گئے چار روزہ میچ کے آخری روز ہانگ کانگ کی ٹیم نے 3 رنز بغیر کسی نقصان کے اپنی دوسری ادھوری اننگز دوبارہ شروع کی تو اسے فتح کیلئے مزید 298 رنز درکار تھے، ہانگ کانگ کی ٹیم پہلی اننگز کی طرح دوسری اننگز میں بھی خاطر خواہ کارکردگی کا مظاہرہ کرنے میں ناکام رہی اور پوری ٹیم 187 رنز پر ڈھیر ہو گئی۔ سخاوت علی 43 اور حسیب امجد 41 رنز بنا کر نمایاں رہے۔ 6 کھلاڑی دوہرا ہندسہ بھی عبور نہ کر سکے۔ برنارڈ نے 3 وکٹیں حاصل کیں۔ نمیبیا نے اپنی دوسری اننگز 232 رنز 5 کھلاڑی آﺅٹ پر ڈیکلیئر کر کے ہانگ کانگ کو فتح کیلئے مجموعی طور پر 301 رنز کا ہدف دیا تھا۔